VOV4.K’ho- Đại sứ quán Việt Nam tàm Lào pa yal bè broă ơm ing broă ai cau rê tàm lơgar Việt Nam gơwèt mờ cau lòt bơh lơgar Lào, tus jơh ngai 30/5/2021. Tềng đap jơnau yal bàr pe ngai do, bàr pe nă làng bol dan gơnoar mut tàm lơgar Lào rê tàm lơgar Việt Nam neh gơtìp ală mpồng tiah nhàr lơgar Việt Nam ờ dờp, Đại sứ quán Việt Nam tàm Lào pà gĭt: broă do là lơh jat sră nggal bơh Văn phòng Chính phủ lơgar Cộng hòa Xã hội Chủ nghĩa Việt Nam dê bè broă “sồr ơm ing mut tàm lơgar gơwèt mờ jơh ală cau dan mut tàm lơgar bơh ală lơgar Ấn Độ,Thái Lan, Campuchia, Lào tus jơh ngai 30/5/2021.

Ală cau neh cih mat dan rê lài mờ ngai 28/4/2021 kung gam geh gơnoar mut tàm lơgar jat jơnau cih. Gơwèt mờ ală cau kuơ màng dan gơnoar mut tàm lơgar Việt Nam, pal geh jơnau ring bal bơh Bộ Ngoại giao lơgar Việt Nam dê mờ lơh jat tơl làm jơnau bơto pơlam bơh Bộ Y tế dê”.

Đại sứ quán sồr làng bol Việt Nam gam ơm kis, lơh broă mờ bơsram tàm lơgar Lào lơh jat niam jơnau sồr bơh lơgar Lào mờ bơh lơgar Việt Nam dê bè rcang sơndră kòp Covid-19, bañ lik bơh tiah ơm kis ờ kờp ală broă jal mhar; bañ lòt is tus mpồng tiah nhàr lơgar tŭ ờ hềt geh ai gơnoar ai rê tàm lơgar, lơh kal ke ai ală mpồl lơh broă geh gơnoar lơh kơnòl broă in.

Cau mblàng K’Hạnh