VOV4.K’ho- Mho ngai 04/5, Đại tướng Đỗ Bá Tỵ, Phó Chủ tịch Quốc hội, Ủy viên Mpồl duh broă tĕ khà dà lơgar, Kuang atbồ Tiểu ban sền gàr bơta lơngap lơngai, rơndap tap sèng mờ gah lơh sơnơm geh dơ̆ lòt sền mờ lơh broă mờ Ủy ban tĕ khà càr Bình Định. Tus tŭ do, Ủy ban tĕ khà càr Bình Định neh crơng gơs 3 mpồl lơh broă tĕ khà Kuang bàng Quốc hội, 19 mpồl lơh broă tĕ khà Hội đồng Nhân dân càr, 110 mpồl lơh broă tĕ khà Hội đồng nhân kấp kơnhoàl, thị xã, ƀòn dờng mờ mờr 1 rơbô 200 mpồl lơh broă tĕ khà Hội đồng Nhân dân kấp xã, sơnah ƀòn.  Tŭ do, Bình Định ờ hềt geh cau bơtờp kòp, mơya gah lơh sơnơm neh rcang lài nền nòn broă lơh rcang sơndră kòp Covid-19; rcang lài gùng dà broă lơh gàr niam bơta lơngap lơngai, rơndap tap sèng.

Đơs tàm dơ̆ lơh broă, ồng  Đỗ Bá Tỵ Phó Chủ tịch Quốc hội đơs ngan, bơh tŭ do tus ngai tĕ khà, Ủy ban tĕ khà càr Bình Định pal pơn jat tai lơh pràn broă lơh mblàng yal mờ uă broă lơh lila, duh hồl rlau. Gah lơh sơnơm geh broă lơh nàng rcang sơndră tàm tŭ digơlan kòp Covid-19 bơtờp tàm càr, gàr niam dơ̆ tĕ khà geh bơyai lơh geh cồng nha niam bơnĕ, ờdo ờdă, tềm pềr.

Cau mblàng K’ Hạnh