VOV4.K’ho- Drim ngai 07/5, Mpồl lơh broă bơh Mpồl duh broă tĕ khà dà lơgar bơh ồng Đỗ Bá Tỵ Phó Chủ tịch Quốc hội, Ủy viên Mpồl duh broă tĕ khà dà lơgar, Kuang atbồ Tiểu ban sền gàr bơta lơngap lơngai, ờdo ờdă mờ gah lơh sơnơm lơh Kuang atbồ mpồl neh lơh broă mờ Ủy ban tĕ khà càr Khánh Hòa lòt sền, sền gròi broă lơh rcang tĕ khà Kuang bàng Quốc hội khoá 15 mờ Kuang bàng Hội đồng Nhân dân ală kấp tơngai lơh broă bơh nam 2021-2026. Jat Ủy ban tĕ khà càr Khánh hoà, gùt càr geh rlau 970 rơbô nă cau tĕ khà, mờ rlau 960 tiah đùh sră. Càr neh crơng gơs 3 mpồl lơh broă tĕ khà Kuang bàng Quốc hội khoá 15, 14 mpồl lơh broă tĕ khà Kuang bàng Hội đồng Nhân dân càr.

 Phó Chủ tịch Quốc hội ồng Đỗ Bá Tỵ đơng lam nàng dơ̆ tĕ khà Kuang bàng Quốc hội mờ Hội đồng Nhân dân ală kấp gàr niam làng bol lơh tờm, ring bal, di mờ adat boh lam, ờdo ờdă, tềm pềr, Ủy ban tĕ khà càr pal sùm sền gròi, lòt sền broă lơh tĕ khà tàm kơnă hơđơm, kờp sền nền non, gĭt loh khà cau tĕ khà, ngan là ală cau tĕ khà gam lòt kŭp ka tàm dà lềng. Tềng đap bơta gơlik geh kal ke bơh kòp Covid-19, Phó Chủ tịch Quốc hội ồng Đỗ Bá Tỵ sồr càr Khánh Hoà lam lơh niam ală broă lơh rcang sơndră kòp.

Cau mblàng K’Hạnh