VOV4.K’ho- Drim ngai 10/9, tàm Hà Nội, Tiểu ban lam sồr mờ hòi jà mpồl bơtiàn- Mpồl đơng lam dà lơgar rcang sơndră kòp Covid-19 bơyai lơh pơrjum lam lơh broă rơndap lơh pơn jat tai bơyai lơh dơ̆ hòi jà tă pơgồp bal dong kờl “Gùt làng bol tam klăc bal, ai bơta pràn rcang sơndră kòp Covid-19”.

Bí thư Đảng dà lơgar, Chủ tịch Uỷ ban Mặt trận dà lơgar Việt Nam ồng Đỗ Văn Chiến, Kuang atbồ Tiểu ban đơng lam Pơrjum pà gĭt, nàng hòi jà bơta pràn tă pơgồp bal ai broă lơh rcang sơndră kòp, Tiểu ban lam sồr mờ hòi jà mpồl bơtiàn geh tơrgùm bơyai lơh hòi jà Kuang bàng, công chức, viên chức, cau lơh broă tàm gùt lơgar tă pơgồp bal tơl nă cau ết ngan rlau jơh dùl ngai priă nhai ai broă lơh rcang sơndră kòp. Bal mờ hơ̆, hòi jà ală mpồl lơh sa kă bro, mpồl cau, cau dùl nă să is dong kờl gah lơh sa suơn sre, phan brê bơnơm, phan tàm dà, phan tàm dà lềng nàng dong kờl làng bol tiah gơtìp wàng se, ai ơm is, ai ơm yah ngài mpồl bơtiàn,  anih ai ơm yah ngài, sơm kòp ai cau kòp Covid-19 in. Mờ Tiểu ban pơn jat tai lam lơh srơh dơ̆ sa piang nùs nhơm, dong cau gơtìp kal ke tài bơh kòp.

Cau mblàng K’Hạnh