VOV4.K’ho- Drim ngai 23/5, ồng Nguyễn Phú Trọng- Tổng Bí thư neh lơh jăt gơnoar tĕ khà tàm anih đùh sră sồ 58, gùng Nguyễn Du, quận Hai Bà Trương, ƀòn dờng Hà Nội. Hơ jơnau lùp tềng đăp gal cau lơh băo tàm lơgar mờ lơgar ndai tơnơ̆ tŭ đùh sră tĕ khà tơn, ồng Nguyễn Phú Trọng tơlik nùs nhơm kơ̆p kờñ, kung bè jơh tơl nă cau tĕ khà tàm gùt lơgar sơl, jơh ală kuang bàng Quốc hội khoá XV mờ kuang bàng Hội đồng Nhân dân ală kấp geh pồ dơ̆ do, geh jơh nùs tài làng bol tài dà lơgar, drơng broă làng bol, lơh jăt wil tơl kơnòl, kơnòl broă dờng màng ngan bơh he dê jăt di Sơnoa boh lam mờ kơrnoat boh lam dê cih.

Ồng Nguyễn Phú Trọng- Tổng Bí thư geh jơnau đơs tơnơ̆ tŭ đùh sră

Ngan là pal dòn song ngan mờ Dà lơgar, mờ làng bol, mờ Sơnoa boh lam lơgar Cộng hoà Xã hội Chủ nghiã Việt Nam, lơh jăt wil tơl kơnòl bơh cau kuang bàng geh làng bol pồ geh, ala măt ai làng bol in nàng tus bal ătbồ dà lơgar, ătbồ mpồl bơtiàn. Ồng Nguyễn Phú Trọng- Tổng Bí thư đơs sùm: dơ̆ tĕ khà dơ̆ do geh lơh geh cồng nha niam bơnĕ, lơh geh nùs nhơm ngai chờ bơh jơh gùt làng bol dê, ngai chờ dờng bơh ù tiah dà lơgar he dê.

Cau mblàng Lơ Mu K’Yến