VOV4.K’ho- Ồng Nguyễn Phú Trọng- Tổng Bí thư neh geh jơnau hòi jà pơyua làng bol, kuang bàng, cau ling tàm gùt lơgar mờ làng bol he tàm lơgar ndai in bè broă lơh rơcăng sơndră kòp dờng Covid-19. Tàm sră pơyua, Tổng Bí thư đơs sùm: “Tŭ do, bơta kòp dờng Covid-19 kung gam gơlik geh kal ke ngan, bơta lơh bơtờp mhar ngan, lơh gơlik bơta aniai hoàc hươr uă ngan bè pràn kơldang să jan mờ màng kis làng bol dê, lơh gơrềng kơn jơ̆ ngan tus lơh sa- mpồl bơtiàn mờ jơh ală bơta bơh rài kis dê.

Bal mờ nùs nhơm “tam dră mờ kòp bè tam lơh mờ bol sò tơm sơl”, sền gàr pràn kơldang să jan, màng kis làng bol dê là hơđang rlau jơh, ala măt kuang bàng đơng lam bồ Đảng mờ Dà lơgar, añ jơh nùs ngan hòi jà jơh gùt Đảng, gùt làng bol, gùt ling klàng mờ làng bol he tàm lơgar ndai: Bol he neh lơh ngan sơlơ lơh ngan rlau tai; neh tam klăc sơlơ tam klăc rlau tai; neh jơh nùs sơlơ jơh nùs uă rlau tai; jơh gùt jơi bơtiàn rbô nă cau bè dùl, dùl nùs bal bal mờ Đảng, Chính phủ, ală kấp, ală gah jòi tơl ală broă lơh ngan jơh nùs kơryan, kơryan tus gơtùi, bañ lời kòp lơh bơtờp uă, lơh bơtờp tàm mpồl bơtiàn. Añ sồr ală kấp ủy, mpồl đảng, gơnoar ătbồ, mpồl đơng lam rơcăng sơndră kòp Covid-19 bơh Dà lơgar tus ƀòn lơgar pal kràñ cê jơh nùs rlau tai tàm broă đơng lam, sồr lơh; tơrgùm uă ngan rlau jơh bơta pràn dà kơlhề, tŭ tơngai, ai lài jơh ală priă jền; rơcăng lài sơndră wơl mờ bơta gơbàn pa bơh kòp bơtờp dê; ngac ngar, bơceh pa lam lơh jăt geh cồng nha broă lơh dờng màng mờ kơrhia ngan do...

Añ pin dờn uă ngan là, jơh gùt lơgar tă pơgồp bal pràn, jơh gùt Đảng, gùt làng bol dùl nùs bal, ring bal bồ tơngoh mờ broă lơh, bal mờ bơta dong kờl jơh nùs jơh tồr bơh làng bol he dê tàm lơgar ndai mờ gơ̆p bơyô dunia dê, ngan ngồn bol he geh tam dră jai pha mờ kòp dờng Covid-19 mờ pal tam dră jai pha tus gơtùi, pơgồp bơnah dipal tàm bơta lơh ngan bal bơh jơh ală kòn bơnus tàm gùt dunia dê tài dùl dunia ờdo ờdă, niam bơnĕ, ring lơngai, lơh bơyô bal, lơh broă bal mờ pas gơs, dipal mờ bơhiàn khin cha jak chài pơnrơ ngan bơh Dà lơgar he dê, Jơi bơtiàn he dê!”.

Cau mblàng Lơ Mu K’Yến