VOV4.K’ho- Mho ngai 15/7, tàm Hìu duh broă Chủ tịch lơgar dê, ồng Nguyễn Xuân Phúc- Chủ tịch lơgar neh geh dơ̆ cribơyai tàm điện thoại mờ ồng Joko Widodo- Kuang ătbồ lơgar Indonesia bè lơh broă bal đah 2 lơgar kung bè ală broă tàm kơnhoàl ù tiah do bal mờ tàm dunia mờ 2 lơgar sền gròi bal. Bàr nă kuang đơng lam bồ dùl nùs ring bal pal sơlơ pơgồp bal, tam pà bal bơta mờng chài tàm broă lơh tam dră mờ kòp Covid-19 mờ geh dờp vaccine geh cồng nha.

Kuang ătbồ lơgar Indonesia jờng rơ ngan cồng nha bơh lơgar Việt Nam dê tàm tŭ lơh jăt jơnau kờñ dơ̆ lĕ bal, gròi sền niam kòp bơtờp mơkung bơtàu tơnguh lơh sa- mpồl bơtiàn sơl. Ồng Nguyễn Xuân Phúc jơh nùs tam pà bal mờ ală bơta kal ke mờ lơgar Indonesia gam pal kong tàm dơ̆ tam dră mờ kòp Covid-19; mờ pin dờn là lơgar Indonesia geh gờñ gròi sền kòp bơtờp mờ bơtàu tơnguh wơl lơh sa. Chủ tịch lơgar he ưn ngài lơgar Indonesia neh lơh broă bal niam mờ lơgar Việt Nam tàm broă lơh sền gàr dong kờl làng bol tìp kal ke tài bơh kòp Covid-19; mờ sồr lơgar Indonesia pơn jăt tai dong kờl ai tơl bơta ai làng bol lơgar Việt Nam in tàm lơgar Indonesia geh kham sơm kòp, ơm yah ngài mờ sơm kòp tàm tŭ dilah gơ jal ir.

Cau mblàng Lơ Mu K’Yến