VOV4.K’ho- Ồng Nguyễn Xuân Phúc- Chủ tịch lơgar pa đơng lam dơ̆ pơrjum dơ̆ pe Mpồl duh broă Sền gàr dà lơgar mờ Lơngăp lơngai tơngai lơh broă bơh nam 2016- 2021. Chủ tịch lơgar pà gĭt, dơ̆ pơrjum dơ̆ pe do gơcèng bơta tơn jơh bơh tơngai lơh broă dê; mơkung cribơyai mờ ring bal ală tơngume kuơmàng, lơh gơlik bơnàng jă ai broă lơh bơh Mpồl duh broă Sền gàr dà lơgar mờ Lơngăp lơngai dê tàm tơngai lơh broă pa lơh gơs jak kơnòl broă jăt jơnau cih bơh Sơnoa boh lam mờ Kơrnoat boh lam dê.

Dơ̆ pơrjum dơ̆ pe Mpồl duh broă Sền gàr dà lơgar mờ Lơngăp lơngai tơngai lơh broă bơh nam 2016- 2021

Chủ tịch lơgar ồng Nguyễn Xuân Phúc đơs sùm, tàm tơngai tŭ do, dà lơgar gam ơm tềng đăp uă bơta lòng bè lơngăp lơngai ờs mờng bơh lài mờ lơngăp lơngai ờ hềt geh bơh lài, tàm hơ̆ geh bơta tam gơl trồ tiah, ngan là kòp Covid-19 gam gơbàn kal ke ngan gơ gơs là broă dờng bơh dà lơgar dê. Bơta do gơ sồr mpồl phàu crong, ngan là mpồl ling klàng, mpồl kuang àng mờ lơh broă mờ lơgar ndai pal tơrgùm jơh bơta pràn nàng tam dră wơl, sền gàr dà lơgar jơnhoa ngan rlau jơh bơta pràn kơldang să jan mờ màng kis làng bol dê. Tềng đăp bơta kòp Covid-19 tàm uă càr, ƀòn dờng tiah đah jum dà lơgar, ồng Nguyễn Xuân Phúc sồr Chính phủ, ală bộ, gah lơh broă dà lơgar mờ gơnoar ătbồ ală tiah ai lài jơh ală bơta pràn rơcăng sơndră kòp, ngan là sền gàr tơl vaccine cĭt rơcăng sơndră kòp ai làng bol in.

Cau mblàng Lơ Mu K’Yến