VOV4.K’ho- Di tơngkah kir sơnrai  96 nam Ngai sră băo Kăc màng Việt Nam (21/6), ồng Nguyễn Xuân Phúc- Chủ tịch lơgar pơyoa jơnau gờm chờ tus jơh gùt ală rnàng  cau lơh băo gùt lơgar dê, mơkung jờng rơ ală cau lơh băo ờ rơngòt bòl glar kal ke, tus bal uă ngan tàm broă lơh rcang sơndră kòp Covid-19 tàm ală tơngai pa do. Tàm sră pơyoa geh gơl cih bè do: “Di tơngkak kir sơnrai Ngai sră băo Kăc màng Việt Nam, añ jờng rơ uă ngan mờ đơs niam ngan kuang bàng, phóng viên, biên tập viên mờ cau kŭp rùp tàm ală anih lơh băo tàm gùt lơgar tàm tơngai pa do. Ală cau do là ală cau neh tă pơgồp bơnah lơh niam rlau tai bơhiàn bơh sră băo Kăc màng Việt Nam bơh Chủ tịch Hồ Chí Minh dê crơng gơs mờ pơlam lơh”.

Chủ tịch lơgar ồng Nguyễn Xuân Phúc ưn ngài ală cau lơh băo dờng sơnam

Lài hơ̆, ồng Nguyễn Xuân Phúc Chủ tịch lơgar neh tus còp, gờm chờ mờ pà phan ală cau lơh băo mờ hìu bơnhă cau lơh băo dờng sơnam pơn jơ jak ngan; tàm hơ̆ geh cau lơh băo dờng sơnam ồng Đặng Minh Phương, nam do 93 sơnam, neh lơh broă tàm 3 sră băo bơh Đảng dê, hơ̆ là: Cứu quốc Nam Trung Bộ, Cờ Giải phóng mờ Nhân Dân. Di dơ̆ tơngkah 96 nam Ngai sră băo Kăc màng Việt Nam, bơh cau lơh băo Đặng Minh Phương dê, Chủ tịch lơgar pơyoa jơnau gờm chờ, lùp còp ală cau lơh băo neh geh uă bơta tă pơgồp bal ai bơta bơtàu tơnguh bơh rài sră băo Kăc màng Việt Nam dê.

Cau mblàng K’Hạnh