VOV4.K’ho-“Ală mpồl ling klàng pal lơh krơh, lơh jat broă tam chi lơi niam chi hơ̆, lơh ngan kơlôi sơnơng tam chi dơm dờng nàng sền gàr tiah ơm kis jŏ jòng. Pơn jat tai lơh jat niam gơnoar broă bơh ală mpồl lơh sa, sền gàr dà lơgar mờ ală mpồl lơh broă geh geh bơta ƀuơn bè ù tiah nàng tam chi, bơtàu tơnguh brê”, do là jơnau sồr bơh ồng Nguyễn Xuân Phúc Chủ tịch lơgar gơwèt mờ ală mpồl ling klàng tàm dơ̆ lam lơh tam chi sùm sùm kah ưn ngài Bác Hồ bơh Bộ Quốc phòng dê bơyai lơh drim ngai 13/04 tàm Tiah tềl lời wơl kah yau K9-Đá chông, Ba Vì, Hà Nội.

Jat jơnau yal bơh Bộ Quốc phòng dê, tàm tơngai bơh nam 2015- 2020, gùt ling klàng neh tam geh mờr 11 tơlak tờm chi tơlir ală bơta. Bơh bồ nam tus tŭ do, mpồl ling tàm ling klàng neh tam geh 1 tơlak 500 rơbô tờm chi tơlir, 737 lồ brê, gơguh 2,7 dơ̆ pơndrờm bal dùl tŭ mờ nam lài. Gùt ling klàng lơh ngan geh lơh sir broă rơndap  lơh tam 3 tơlak 300 rơbô tờm chi mờ 1 rơbô 785 lồ brê tàm nam do. Chủ tịch lơgar sồr Bộ Quốc phòng pal tơrgùm lơh pràn broă mblàng yal tàm làng bol, tàm Kuang bàng, cau ling bè gơnoar broă, bè bơta kuơ bơh broă tam chi, tam brê, mơkung lam lơh geh cồng nha broă lơh tam 1 tơmàn tờm chi tơlir –tài bơh dùl Việt Nam tơlir mờ ală broă rơndap lơh lơh broă ngan gồn mờ geh ngan.

Cau mblàng K’ Hạnh