VOV4.K’ho- Ồng Nguyễn Xuân Phúc, Thủ tướng Chính phủ đơng lam pơrjum mờ Kuang đơng lam bồ Thành ủy Hà Nội. Do là dơ̆ 9 tàm tơngai lơh broă do Thủ tướng đơng lam lơh broă, đơng lam ală dơ̆ pơrjum mờ Hà Nội nàng iăt, kơno tơn, sồr lơh, tă bơsong ală bơta kal ke kòlyan, dong ƀòn dờng bơtàu tơnguh pràn kơl dang rlau tai. 3 nhai bồ nam do, ƀòn dờng pơn jat tai lơh jat geh cồng nha “jơnau kờñ dơ̆ lĕ bal”, rcang sơndră kòp mờ nùs nhơm “sơndră mờ kòp bè tam dră mờ bol sò tơm”, mơkung lơh pràn broă lơh sa kă bro. Jơh ală broă jàu bè lơh sa, kă bro, ndrờm uă rlau pơndrờm dùl tŭ bal mờ nam lài.

Thủ tướng Nguyễn Xuân Phúc lơh broă mờ Kuang đơng lam bồ Thành ủy Hà Nội

Đơs tàm dơ̆ lơh broă, ồng Nguyễn Xuân Phúc Thủ tướng Chính phủ đơs ngan, Đảng, Dà lơgar sền gròi uă ngan tus bơta bơtàu tơnguh bơh càr lơgar dê, mờ bơta hơ̆ geh tơngŏ tàm broă tơngai pa do neh iăt, kơno mờ bơsong uă ngan jơnau đơs, jơnau dan bơh Hà Nội dê. Bè kơnòl broă bơtàu tơnguh Hà Nội tàm tơngai tus, ồng Nguyễn Xuân Phúc Thủ tướng Chính phủ đơs wơl gơnoar broă là tiah tờm lơh sa, chính trị, bơta niam chài, tìp mat lơh kuèng dunia bơh gùt lơgar dê, Dà lơgar tơngờr sền mờ càr lơgar. Den tàng, Hà Nội pal pơnđơl pràn lơh ngan nàng gơ gơs là càr lơgar lơngap lơngai, niam bơnĕ, pràn kơl dang jơh bal phan bơna mờ nùs nhơm.

Cau mblàng K’ Hạnh