VOV4.K’ho- Mho ngai 23/3, tàm Hìu duh broă Chính phủ dê, ồng Nguyễn Xuân Phúc Thủ tướng Chính phủ wă rò Đại sứ lơgar Áo ồng Thomas Schuller-Gotzburg mờ ồng Ingolf Schroeder Kuang ătbồ đơng lam Công ty AT mờ S gam lòt jòi anih bơcri priă rơndăp broă lơh công nghệ cao geh broă lơh dờng.

Ồng Nguyễn Xuân Phúc Thủ tướng Chính phủ jờng rơ ồng Ingolf Chroeder mờ ală kuang bàng bơh Công ty AT mờ S gam kơlôi sơnơng mờ bơcri priă, kă bro tàm lơgar Việt Nam. Đại sứ lơgar Áo tơlik nùs nhơm tơngŏ nùs nhơm pin dờn rơndăp broă lơh mờ AT mờ S lam lơh geh dipal mờ bơta bơtàu tơnguh bơh lơgar Việt Nam dê bè gơhòi gơ jà bơcri priă công nghệ cao.

Do là rơndăp broă lơh bơcri priă geh broă lơh dờng pơgăp 1 tơmàn 500 tơlak euro, gơhòi gơ jà pơgăp 6 rbô nă cau lơh broă. Jờng rơ ală jơnau đơs tă pơgồp bơh AT mờ S dê, ồng Nguyễn Xuân Phúc Thủ tướng Chính phủ đơs loh, ală rơndăp broă lơh bơcri priă FDI ndrờm lơh geh cồng nha lơm. Chính phủ lơgar Việt Nam ai tơl bơta ƀươn ai ală cau bơcri priă lơgar ndai in lơh sa geh cồng nha tàm lơgar Việt Nam. Thủ tướng đơs là, bơta phan bơna tàm Thái Nguyên mờ ƀòn dờng Hồ Chí Minh ndrờm ƀươn ngan. Do kung là tŭ tơngai niam gơwèt mờ ală mpồl lơh sa kă bro dờng bơh lơgar ndai dê. Thủ tướng kơ̆p kờñ AT mờ S gờñ ai tơlik kơrnoat lơh nền bơcri priă.

Cau mblàng Lơ Mu K’Yến