VOV4.K’ho- Ngai 30/3, tàm Hìu duh broă Chính phủ dê, ồng Phạm Bình Minh Phó Thủ tướng Chính phủ, Bộ trưởng Bộ Ngoại giao Việt Nam neh geh dơ̆ cribơyai pờ tơlik tơn tàm internet mờ ồng John Kerry, kuang bàng ala măt bơh Kuang ătbồ lơgar Mỹ dê bè Tam gơl trồ tiah. Bàr gah dùl nùs ring bal đơs bơta gĭt gơ̆p Tam klăc lơh broă bal tơl làm đah Việt Nam mờ Mỹ pơn jăt tai bơtàu tơnguh pràn kơldang tàm jơh ală gah broă, cèng wơl bơta kuơ ngan ngồn ai làng bol 2 lơgar in.

Ồng Phạm Bình Minh Phó Thủ tướng Chính phủ, Bộ trưởng Bộ Ngoại giao Việt Nam jờng rơ broă Gơnoar ătbồ lơgar bơh ồng Joe Biden Kuang ătbồ lơgar Mỹ dê sơlơ hơ pơrgon mờ lơh ală broă lơh ngan gùt plai ù nàng kờñ sơndră wơl mờ tam gơl trồ tiah, tàm hơ̆ geh broă Mỹ mŭt bal wơl tàm Hiệp định Paris bè tam gơl trồ tiah.

Phó Thủ tướng đơs nền, là dùl tàm ală lơgar kong gơrềng kơn jơ̆ ngan rlau jơh bơh tam gơl trồ tiah dê, bal mờ gùng dà pràn kơldang mờ bơta lơh ngan jơh nùs chính trị uă, Việt Nam neh, gam mờ geh dùl nùs bal mờ ală jơnau hơ pơrgon dunia mờ lơh broă bal niam bơnĕ mờ ală lơgar nàng bơsong ală bơta lòng bè tam gơl trồ tiah, tàm hơ̆ geh tơnguh tai lơh broă bal mờ Mỹ.

Cau mblàng Lơ Mu K’Yến