VOV4.K’ho- Mho ngai 19/8, ồng Phạm Minh Chính- Thủ tướng Chính phủ neh geh dơ̆ cribơyai tàm điện thoại mờ ồng Pascal Soriot- Kuang ătbồ dờng Tập đoàn AstraZeneca. Tàm dơ̆ cribơyai tàm điện thoại, ồng Phạm Minh Chính đơs nền, vaccine AstraZeneca là dùl tàm ală bơta vaccine geh ngui uă ngan rlau jơh tàm dunia, geh tus rlau 65% khà vaccine mờ Việt Nam neh dờp geh tus tŭ do, pơgồp bơnah kuơmàng tàm broă lơh ngan kơryan kòp bơtờp tàm gùt plai ù mờ tàm Việt Nam.

Tàm tơngai kòp Covid-19 pơn jăt tai gơbàn kal ke, Thủ tướng sồr ồng Pascal Soriot- Kuang ătbồ dờng AstraZeneca sền gròi sồr lơh mhar ală tŭ tơngai jàu vaccine ai Việt Nam in, tềng đăp mat là lơh sir jơh jơnau hơ pơrgon jàu 8 tơlak ding vaccine tàm nhai 8 do, mơkung sơlơ tơnguh tai mờ lơh ngan lơh sir jơh sră hơ tăc tai vaccine ai lơgar Việt Nam in tàm nhai 9 nam do tơn mờ broă rơndăp lơh tus lồi nam 2021. Thủ tướng sồr mờ kơ̆p kờñ AstraZeneca sền swì, cribơyai mờ ală lơgar ndai nàng geh càn, tam pà wơl khà vaccine tŭ do ờ hềt geh jơnau kờñ ngui; mơkung hòi jà lơh ală sră hơ pơrgon vaccine lời ai kơnòm dềt mờ cau hơđơm 18 sơnam in, ală cau geh pơhìn uă, tàm să neh geh kòp lài.

Cau mblàng Lơ Mu K’Yến