VOV4.K’ho- Mho ngai 06/4, tàm hìu lơh broă Chính phủ, di dơ̆ ồng Phạm Minh Chính geh pồ at gơnoar broă Thủ tướng Chính phủ dà lơgar Cộng hoà Xã hội chủ nghiã Việt Nam, Thủ tướng Chính phủ dà lơgar Lào ồng Phankham Viphavanh mờ Thủ tướng lơgar Campuchia ồng Samdech Techo Hun Sen neh hòi điện thoại gờm chờ.

Thủ tướng ồng Phạm Minh Chính

Thủ tướng lơgar Lào ồng Phankham Viphavanh mờ Thủ tướng lơgar Campuchia ồng Hun Sen ndrờm tơngŏ bơta pin dờn mờ bơta pin dờn uă ngan bơh Đảng, Dà lơgar mờ làng bol Việt Nam dê, Thủ tướng ồng Phạm Minh Chính geh lơh sir jak ngan kơnòl broă geh jàu, đơng lam Chính phủ Việt Nam lơh geh uă cồng nha pa tàm broă lơh bơt bơtàu mờ bơtàu tơnguh dà lơgar, sùm tơnguh uă gơnoar broă, bơngă pin dờn bơh Việt Nam dê tàm tiah do mờ tàm broă lơh Chính trị tàm dunia.

Thủ tướng ồng Phạm Minh Chính mờ Thủ tướng lơgar Lào ồng Phankham Viphavanh ring bal tơnguh uă rlau tai cồng nha pơgồp bal đah 2 Chính phủ dê, lơh jat niam ală jơnau ring bal kấp Kuang bàng dờng màng mờ cồng nha pơrjum Ủy ban bàr Chính phủ Việt Nam mờ Lào dơ̆ 43. Thủ tướng ồng Phạm Minh Chính  mờ Thủ tướng lơgar Campuchia ồng Hun Sen kung ring bal pơn jat tai pơgồp niam tàm ală dơ̆ pơrjum uă lơgar, bal mờ ală lơgar ndai gàr niam bơta tam klăc bal mờ tơnguh gơnoar broă tờm bơh ASEAN dê.

Cau mblàng K’ Hạnh