VOV4.K’ho- Di dơ̆ ồng Phạm Minh Chính Thủ tướng Chính phủ  geh pồ at gơnoar broă Thủ tướng Chính phủ lơgar Cộng hòa xã hội chủ nghĩa Việt Nam, ngai 20/4, Thủ tướng Singapore ồng Lý Hiển Long neh hòi điện  thoại gờm chờ. Ồng Phạm Minh Chính Thủ tướng Chính phủ ưn ngài Thủ tướng Singapore neh pơyoa sră mờ hòi điện thoại gờm chờ, tơngŏ bơta kơ̆p kờñ lơh broă bal niam mờ Thủ tướng lý Hiển Long nàng tơnguh rlau tai bơta gĭt gơ̆p lơgar lơh broă bal jŏ jòng Việt Nam mờ Singapore tàm jơh ală gah. Bàr Thủ tướng tơngŏ bơta chờ hờp tềng đap ală broă bơtàu tơnguh niam ngan tàm bơta gĭt gơ̆p lơh broă bal 2 lơgar dê, bulah ală bơta kal ke bơh kòp dờng Covid-19 dê lơh gơlik.

Thủ tướng Chính phủ ồng Phạm Minh Chính cribơyai tàm điện thọai mờ  Thủ tướng Singapore ồng Lý Hiển Long

Bàr Thủ tướng dùl nùs bal sơlơ tơnguh lơh broă bal tàm jơh ală gah mờ 2 gah geh bơta pràn, bơta ƀuơn mờ bơta pràn bè priă jền, công nghệ thông tin, lơh sa suơn sre, phan tàm dà, bơto bơtê, phan bơna... rề ơnàng tus ală gah di pal mờ jơnau kờñ tàm rài pa kac màng công nghiệp dơ̆ 4 bè bơtàu tơnguh năng lượng kloh, tiah drà ngăc ngar, tam gơl pa bơceh pa, lơh sa sồ mờ sồ hoá; tam pà bal bơta mờng chài atbồ mờ bơtàu tơnguh lơh sa, bơto bơtê mpồl cau lơh broă, ngan mờ mpồl cau lơh broă geh bơta jak chài uă.

Cau mblàng K’ Hạnh