VOV4.K’ho- Mho ngai 24/5, tàm hìu lơh broă Chính phủ, ồng Phạm Minh Chính, Thủ tướng Chính phủ đơng lam dơ̆ pơrjum mờ Thường trực Chính phủ bè broă lơh rcang sơndră kòp Covid-19. Đơs tàm dơ̆ pơrjum, Thủ tướng đơs sùm, poh lài bơta gơlik geh bơh kòp dê kung gam bơtờp mhar tàm uă tiah, ngan là tàm ală tiah lơh sa mờ măy mok. Chính phủ, Thủ tướng Chính phủ, Mpồl đơng lam dà lơgar rcang sơndră kòp Covid-19 neh sồr lơh ngan, geh ală kấp ủy, gơnoar atbồ mờ làng bol mut lơh bal pràn ngan mờ bơta lơh ngan jơh nùs kơryan kòp. Thủ tướng đơs nền, broă lơh rcang sơndră kòp Covid-19 geh sền gròi neh pơgồp bơnah bơyai lơh geh cồng nha dơ̆ tĕ khà Kuang bàng Quốc hội khoá 15 mờ Kuang bàng Hội đồng Nhân ală kấp tơngai lơh broă bơh nam 2021-2026.

Thủ tướng đơs tàm dơ̆ pơrjum

Thủ tướng sồr, pal tềm pềr dơ̆ ngui ờ kuơ nàng tơrgùm ai sơnơm vaccine in, hòi jà tă pơgồp priă jền ndai di pal mờ adat boh lam, bơt bơtàu kes priă vaccine. Ală Bộ, gah sơnah lơh broă dà lơgar pal geh jơnau sồr bơt bơtàu kes priă sơnơm vaccine tàm nùs nhơm hòi jà bơta pràn bơh gùt làng bol, bơh mpồl lơh sa kă bro, ală anih lơh broă, mpồl lơh broă, ală tiah, bơh cau dùl nă să is, cau geh nùs nhơm niam tàm nùs nhơm yal loh làng, song dơ pă, ring bal, jơh bal bè bơta tă pơgồp, dơ̆ ngui mờ ngui.

Cau mblàng K’Hạnh