VOV4.K’ho- Mho ngai 11/7, ồng Phạm Minh Chính- Thủ tướng Chính phủ bal mờ mpồl kuang bàng Chính phủ dê geh dơ̆ lơh broă mờ kuang đơng lam bồ ƀòn dờng Hồ Chí Minh mờ lòt sền broă lơh rơcăng sơndră kòp tàm ƀòn dờng Hồ Chí Minh. Đơs tàm dơ̆ lơh broă, Thủ tướng đơs sùm, broă lơh jăt Chỉ thị sồ 16 gơwèt mờ ƀòn dờng là dùl broă lơh kal ke, mơya tus tŭ jiơ do gơtùi đơs nền do là jơnau lơh nền dipal, ring bal bơta gĭt wă, dờp gĭt broă tờm, broă kuơ màng di tŭ di anih.

Thủ tướng jờng rơ ngan broă ƀòn dờng Hồ Chí Minh lơh jăt dùl tŭ bal 2 kơnòl broă hơ̆ là, rơcăng sơndră kòp ndang mơkung bơtàu tơnguh lơh sa- mpồl bơtiàn ndang. Thủ tướng sồr pal lơh jăt bơta lơh gơtùi, sền swì nền jơnau bơh tài gơbàn bơh ală broă ờ hềt pràn jak dê nàng bơsong tŭ lam lơh jăt.

Lơh lài rơcăng sơndră kòp mờ sền gròi rài kis làng bol in là hơđang rlau jơh, ờ gŏ di lời làng bol lơi gơtìp ờ geh piang sàu àu soh, tơrmù uă ngan rlau jơh ală cau chơ̆t. Thủ tướng tơngkah, bơta gơbàn bơh kòp dê là ờ hềt tŭ lơi geh bơh lài, den tàng bè hơ̆ tŭ lam lơh jăt pal jăt mờ ki ngàm bơta geh ngan, ai bơta geh ngan nàng lơh gai was, bañ sồr uă ir, bañ duh nùs sơrbac mhar ir, lơh ndang ai jơnau bơsram mờng chài ndang.

Cau mblàng Lơ Mu K’Yến