VOV4.K’ho- Dờp jơnau jà bơh ồng Sultan Haji Hassanal Bokiah Bơtau lơgar Brunei Darussalam dê mơkung là Kuang ătbồ mpồl ASEAN nam 2021, drim do 23/4, ồng Phạm Minh Chính Thủ tướng Chính phủ neh lòt bơh Hà Nội, lam bồ mpồl kuang bàng kấp dờng màng ala măt lơgar Việt Nam tus bal Pơrjum ală Kuang đơng lam bồ ASEAN tàm anih lơh broă Mpồl cau gơnoar cih ASEAN dê tàm càr lơgar Jakarta, lơgar Indonesia tàm 2 ngai, ngai do mờ ngai hìng (23- 24/4).

Do là dơ̆ lòt lơh broă lơgar ndai dơ̆ sơnrờp tàm gơnoar là cau lam bồ Chính phủ bơh ồng Phạm Minh Chính Thủ tướng Chính phủ dê, đơs nền broă lơh lài ngan bơh Việt Nam dê là lơh kơ̆ kơl jăp mờ sơlơ tam klăc bal, tàm dong kờl bal mờ ală dà lơgar tàm mpồl ASEAN, pơgồp bơnah yờ tơnguh gơnoar broă tiah tờm mờ bơngă pin dờn bơh ASEAN dê tàm tŭ bơsong ală bơta lòng gơlik geh, bơh hơ̆ lơh gơlik geh tiah ơm kis ring lơngai, ƀươn ƀoài ai bơtàu tơnguh kơ̆ kơl jăp jŏ jòng bơh tơl lơgar dê mờ bơh jơh gùt kơnhoàl ù tiah do dê.

Cau mblàng Lơ Mu K’Yến