VOV4.K’ho- Mho ngai 05/9, ồng Phạm Minh Chính- Thủ tướng Chính phủ, Kuang ătbồ Mpồl đơng lam Dà lơgar rơcăng sơndră kòp Covid-19 neh đơng lam pơrjum pờ tơlik tơn tàm internet jơh gùt lơgar Mpồl đơng lam Dà lơgar rơcăng sơndră kòp Covid-19 mờ ală càr bè broă lơh rơcăng sơndră kòp Covid-19. Dơ̆ pơrjum geh tàm tơrbŏ tus rlau 9 rbô anih tàm ală xã, sơnah ƀòn, thị trấn; quận, kơnhoàl, thị xã; càr, ƀòn dờng tàm jơh gùt lơgar. Thủ tướng đơs sùm, dơ̆ pơrjum ai broă tờm cribơyai broă rơcăng sơndră kòp tàm xã, sơnah ƀòn, thị trấn mờ đơs uă tus broă tŭ lơh jăt jơnau sồr ơm yah ngài mpồl bơtiàn den xã, sơnah ƀòn, thị trấn pal lơh bơta lơi, làng bol pal lơh bơta lơi.

Yal tàm dơ̆ pơrjum, ồng Nguyễn Thanh Long- Bộ trưởng Bộ Y tế pà gĭt, bơta kòp gơbàn kal ke ngan, dơ̆ bơtờp kòp dơ̆ 4 sơnđờm gơbàn bơh ngai 27/04/2021 tus ngai 05/9/2021, gŏ rlau 520 rbô nă cau bơtờp kòp, mờr 289 rbô nă cau neh bời kòp (55%) mờ mờr 13 rbô nă cau neh chơ̆t; Jơh gùt lơgar neh cĭt vaccine geh rlau 21 tơlak 500 rbô ding, lơh geh mờr 30% khà cau bơh 18 sơnam rlau hơđang. Broă lam lơh jăt kung gam sơl là broă ờ pràn ngan rlau jơh, ngan là tàm ƀòn lơgar tàm bàr pe tiah. Tàm dơ̆ pơrjum, Thủ tướng sồr tàm tơrbŏ nisơna mờ uă kuang đơng lam bồ xã, sơnah ƀòn, quận, kơnhoàl geh bơta kòp gơbàn kal ke tàm gùt lơgar. Cau lam bồ Chính phủ să tờm tus sền tơn cau lam bồ anih lơh broă gĭt loh tus kàr lơi bè bơta kòp gơbàn, gùng dà broă lơh tam dră mờ kòp, ală jơnau đơs đơng lam bơh Dà lơgar dê mờ sùm geh ală jơnau lùp bè broă lơh sơm kòp ai cau kòp F0 in, broă lơh lơh sơnơm, xét nghiệm, sền gàr ờdo ờdă rài kis mpồl bơtiàn in.

Cau mblàng Lơ Mu K’Yến