VOV4.K’ho- Kes priă vaccine rcang sơndră kòp Covid-19 neh ngan ngồn tơlik mat mờ jơnau kờñ hòi jà tă pơgồp tơl priă jền sơm bat tê bal, dùl nùs bal mờ Chính phủ nàng geh sơnơm vaccine gờñ ngan rlau jơh cĭt ai làng bol in.

 Thủ tướng ồng Phạm Minh Chính tus bal dơ̆ tơlik mat tĕ khà Kes priă vaccine rcang sơndră kòp Covid-19

Đơs tàm dơ̆ tơlik mat, ồng Phạm Minh Chính- Thủ tướng Chính phủ neh đơs: “Do là kes priă bơh nùs nhơm kờñ gơboh kòn bơnus, bơh nùs nhơm tam klăc bal, bơh bơta pin dờn, bơh plai nùs tàm tơrƀŏ bal nàng bol he bal mờ gơ̆p sơr let gan bơta kal ke, pơgồp bơnah lơh geh dùl Việt Nam jai pha”. Jat bơta tàm pà priă jền nàng blơi sơnơm vaccine mờ cĭt ai 75 tơlak nă làng bol in, Việt Nam kờñ geh 150 tơlak ding sơnơm vaccine, mờ khà priă là rlau 25 rơbô tơmàn đong.

Den tàng bè hơ̆, nàng geh tơl priă jền blơi sơnơm vaccine mờ cĭt sơnơm ai làng bol in jat jơnau kờñ neh geh ai. Broă crơng gơs Kes priă vaccine rcang sơndră kòp Covid-19 nàng kờñ hòi jà làng bol, cau ling gùt lơgar, làng bol Việt Nam kis tàm lơgar ndai, ală mpồl lơh sa kă bro, cau lơh sa kă bro, cau dùl nă să is tàm lơgar mờ lơgar ndai tus bal is tă pơgồp, dong kờl ai Kes priă vaccine rcang sơndră kòp Covid-19 in mờ nùs nhơm geh kơnòl tài bơta pràn kơl dang să jan tơl nă cau in, tài mpồl bơtiàn, tài dà lơgar, jơi bơtiàn bal mờ nùs nhơm tam klăc bal dunia, sơm bat tê bal kơryan kòp dờng.

Cau mblàng K’Hạnh