VOV4.K’ho- Ngai 22/7, tàm Hìu duh broă Chính phủ, ồng Phạm Minh Chính- Thủ tướng Chính phủ neh wă rò ồng Ben Wallace- Bộ trưởng Quốc phòng lơgar Anh mờ đah tô Ai-len gam geh dơ̆ lòt còp mờ lơh broă tàm lơgar Việt Nam.

Tàm dơ̆ wă rò, ồng Phạm Minh Chính pà gĭt, dơ̆ lòt còp là cơng tàng tơngŏ loh làng ai jơnau kơ̆p kờñ bal bơh bàr gah dê tàm broă tơnguh bơta gĭt gơ̆p lơh bơyô bal, lơh broă bal geh kuơ bal đah Bộ Quốc phòng, mpồl ling mờ làng bol 2 lơgar dê, pơgồp bơnah lơh jrô ơnàng rlau tai bơta gĭt gơ̆p Tam klăc lơh broă bal jŏ jòng đah Việt Nam mờ Anh.

Thủ tướng Việt Nam ồng Phạm Minh Chính đơs sùm mờ sồr Chính phủ lơgar Anh pơn jăt tai dong kờl ai pà vaccine ai Việt Nam in, ai tơl bơta nàng Việt Nam gờñ dờp geh vaccine jăt sră neh kĭ hơ bơh broă lơh Covax, geh blơi vaccine rơcăng sơndră kòp Covid-19 mhar ngan rlau jơh, uă ngan rlau jơh dilah gơtùi, kung bè gờñ bơto pơlam ngui măy mok lơh gơlik vaccine rơcăng sơndră kòp Covid-19.

Cau mblàng Lơ Mu K’Yến