VOV4.K’ho - Tàm dơ\ tus còp khà dà lơgar tus lơgar Ethiopia, mho òr (24/8), Chủ tịch lơgar Trần Đại Quang neh tơr`a broa\ mờ mò Kera Ibrahim, Chủ tịch thượng viện lơgar Ethiopia. Ồng Trần Đại Quang đơs tờm, Việt Nam sùm sền kuơ broa\ sùm lơh git gơp bơhìan mờ chul chồl lơh broa\ bal ua\ gah mờ lơgar Ethiopia. Ồng sồr Thựơng viện Ethiopia lơh ngan kờ` bal mờ pơnjờng ala\ chính sách pờ mpồng bơh Chính phủ Ethiopia, dong bơta bươn bòai nàng ala\ mpồl lơh sa ka\ bro Việt Nam jòi gùng lơh  sa ka\ bro bal, bơcri  tàm lơgar Ethiopia tàm ala\ gah broa\ mờ lơgar Việt Nam pràn mờ ua\ mờng chài bè lơh sa suơn sre,  ka\ bro,  viễn thông,  gah rơndeh par, lơh hìu ma\y pờ tơlik ồs đèng di mơ mờ dềt…

Bè lơh broa\ bal 2 nghị viện, ồng Trần Đại Quang  sồr ala\ anih lơh broa\ nghị viện 2 lơgar chul chồl lơh pràn  broa\ lơh tam cri bơyai mpồl, tam pà bơta mờng lơh gơs adat boh lam, mờ sền gròi,  pơ gồp bal chul chồl lơh broa\ bal 2 lơgar.

Tàm dơ\ tus còp khà dà lơgar tus lơgar Ethiopia, mang òr, ồng Trần Đại Quang neh tus còp hìu lơh broa\ mpồl tam klac châu Phi (AU) mờ geh bùi tìp mờ lơh broa\ mờ mò Amira Elfadil Mohammed Elfadil la kuang  jàu gơnoar lơh broa\ Chủ tịch Ủy  ban mpồl tam klac châu Phi.

Cau mblàng K’ Brọp