VOV4.K’ho- Di dơ̆ Pơrjum dờng tơngkah kir sơnrai 2565 nam ngai deh yàng Phờk, nam 2021 mờ tơngkah 40 nam Ngai crơng gơs Mpồl duh broă yàng Phờk Việt Nam (1981 - 2021), drim ngai 19/5, tàm Hà Nội, ồng Trần Thanh Mẫn Ủy viên Bộ Chính trị, Phó Chủ tịch Thường trực Quốc hội neh tus còp, gờm chờ Hòa thượng Thích Thanh Nhiễu, Phó Chủ tịch Thường trực Mpồl đơng lam Mpồl duh broă yàng Phờk dà lơgar Việt Nam, bal mờ Văn phòng 1 gơwèt dà lơgar Mpồl duh broă yàng Phờk Việt Nam. Ala mat Kuang đơng lam bồ Đảng mờ Dà lơgar, ồng Trần Thanh Mẫn pơyoa tus jơh gùt mpồl cau duh broă yàng Phờk, ală cau jat yàng phờk Việt Nam ală jơnau gờm chờ niam ngan rlau jơh; gờm chờ Mpồl duh broă yàng Phờk Việt Nam wă dùl kàl tơngkah kir sơnrai ngai deh yàng Phờk dê chờ hờp, lơngap lơngai, bềng bơta kờñ gơboh bal mờ sùm tam klăc bal tàm mpồl tam klăc dờng jơh gùt jơi bơtiàn dê.

Đơs ngan, bơta kòp Covid-19 gam bơtờp uă mờ geh bơta gơlik geh kal ke di tŭ tơngai tĕ khà Kuang bàng Quốc hội khoá 15 mờ Kuang bàng Hội đồng Nhân dân ală kấp, ồng Trần Thanh Mẫn kơ̆p kờñ Mpồl duh broă  yàng Phờk Việt Nam hòi jà tĕ khà, làng bol tus bal lòt đùh sră ờdo ờdă, geh cồng nha; mơkung tơngŏ bơta kơ̆p kờñ ală cau duh broă yàng Phờk là cau tơlik mat tĕ khà Kuang bàng Quốc hội khoá 15 mờ Kuang bàng Hội đồng Nhân dân ală kấp tơngai lơh broă bơh nam 2021-2026 dilah gơ kờn tĕ khà geh tai jơnau đơs, yal ală nùs nhơm, bơta kơ̆p kờñ bơh làng bol dê tus mờ Đảng mờ Dà lơgar.

Cau mblàng K’Hạnh