VOV4.K’ho-Mho ngai 29/6, tàm hìu lơh broă Đảng dà lơgar, Mpồl ala mat Đảng bơh ồng Võ Văn Thưởng, Thường trực Ban Bí thư lam bồ mpồl, neh tus bal Pơrjum kƀàng wil pờ tơlik tơn tàm internet ală Đảng chính trị Nga- ASEAN. Pơrjum geh bơyai lơh jat jơnau bơceh lơh bơh Đảng lơgar Nga Thống nhất dê tàm tơngai nam 2021 là nam tơngkah kir sơnrai 30 nam crơng gơs bơta gĭt gơ̆p Nga mờ ASEAN, 25 nam gĭt gơ̆p lơh broă bal cribơyai bal Nga mờ ASEAN.

Tàm dơ̆ pơrjum, Kuang đơng lam bồ ală đảng chính trị tam pà bal nùs nhơm bè bơta kờñ pal geh lơh ngan rơndap tap sèng sền gàr bơta lơngap lơngai mờ lơh broă bal tiah châu Á-Thái Bình Dương. Ală Kuang bàng tơngŏ bơta sền dờng màng gơwèt mờ gĭt gơ̆p lơh broă bal Nga mờ ASEAN, ring bal lơh pràn lơh broă bal tàm ală gah sền gàr tiah ơm kis mờ bơtàu tơnguh kơ̆ kơl jap, sền gàr bơta lơngap lơngai yal tơngĭt jơnau dunia, sền gàr tơl niam phan ngui sa. Ală gah kung ring bal bè bơta kờñ pal geh sơlơ tơnguh lơh broă bal ală đảng dunia nàng kờñ lơh jrô ơnàng rlau tai gĭt gơ̆p chính trị, lơh sa mờ mpồl bơtiàn đah lơgar Nga mờ ală lơgar ASEAN; dong kờl lơh tơnguh ală broă lơh ngan bal nàng sơr lèt gan ală bơta lòng gùt plai ù mờ bơsong ală broă tàm tiah do dê.

Cau mblàng K’Hạnh