VOV4.K’ho- Ồng Vũ Đức Đam- Phó Thủ tướng Chính phủ, Kuang ătbồ Mpồl đơng lam dà lơgar rơcăng sơndră kòp Covid-19 pa pơrjum pờ tơlik tơn tàm internet mờ kuang đơng lam bồ càr Đồng Nai.

Đơs sồr lơh tàm dơ̆ pơrjum, ồng Vũ Đức Đam tơngkah, Đồng Nai là càr ơm rềp mờ ƀòn dờng Hồ Chí Minh, geh rlau 500 rbô nă công nhân tàm tiah lơh sa mờ măy mok, geh anih ơhò ơm, ơm rềp mờ Bình Dương...dilah lời kòp bơtờp tàm càr den digơlan “kal ke ngan gĭt lơh”. Den tàng bè hơ̆, càr pal gròi sền kràñ cau lòt bơh ƀòn dờng Hồ Chí Minh, Bình Dương tus Đồng Nai mờ sơlơ̆u wơl. Ồng Vũ Đức Đam đơs sùm, gròi sền kràñ ờ gŏ di là kơryan jơh ờ, mờ là pal lơh pràn ngui măy mok yal tơngĭt jơnau nàng gròi sền cau lòt rê. Tàm tŭ dilah geh kòp bơtờp tàm càr, kuang đơng lam bồ càr Đồng Nai pal pal ring bal wàng se kơryan kòp bơh chờm tơn, lơh mhar, sền gàr wil tơl rơndeh rơndồ, phan bơna nàng mpồl cau lơh sơnơm in iang nùs, tơrgùm tàm broă lơh ờs mờng tam dră mờ kòp.

Cau mblàng Lơ Mu K’Yến