VOV4.K’ho- Mho ngai 20/7, ồng Vũ Đức Đam- Phó Thủ tướng Chính phủ, Kuang ătbồ Mpồl đơng lam dà lơgar bè rơcăng sơndră kòp Covid-19 neh lơh broă mờ kuang đơng lam bồ ƀòn dờng Hồ Chí Minh bè broă lơh tam dră mờ kòp mờ broă cĭt vaccine.

Ồng Vũ Đức Đam- Phó Thủ tướng lơh broă mờ ƀòn dờng Hồ Chí Minh bè broă lơh tam dră mờ kòp Covid-19

Jăt ồng Vũ Đức Đam đơs, Chính phủ mờ Mpồl đơng lam dà lơgar bè rơcăng sơndră kòp Covid-19, ngan là Thủ tướng Chính phủ sền gròi ngan tus bơta kòp bơtờp tàm ƀòn dờng Hồ Chí Minh. Pơndrờm mờ càr Bắc Giang, den ƀòn dờng Hồ Chí Minh geh bơta krơi is uă ngan bè broă lơh sa- mpồl bơtiàn, den tàng bè hơ̆ Chính phủ tam pà bal ală kal ke mờ bòl glar bơh làng bol ƀòn dờng Hồ Chí Minh dê.

Phó Thủ tướng đơs sùm, broă ơm yah ngài den gơ sồr pal lơh kràñ, bulah uă tiah ơm yah ngài kal ke ngan mơya kung gam pal lơh kràñ sơl. Bộ Y tế geh lời ai bơta ai lài uă ngan rlau jơh bè phan bơna măy mok ai ƀòn dờng Hồ Chí Minh in, mơya bơh jơnau dan bơh ƀòn dờng Hồ Chí Minh dê bal mờ 18 broă, uă phan bơna măy mok kal ke ngan blơi, den tàng bè hơ̆ pal ngui đau ală phan bơna măy mok neh geh lài mờ lơh ngan tơrmù ƀà jơnau cau F0 gơ tơngŏ kòp nggờc gơ gơs kơn jơ̆.

Cau mblàng Lơ Mu K’Yến