VOV4.K’ho- Mho ngai 10/6, ồng Vương Đình Huệ- Chủ tịch Quốc hội neh lòt còp mờ lơh broă mờ Học viện lơh sơnơm ling klàng. Đơs tàm dơ̆ lơh broă, ồng Vương Đình Huệ jờng rơ ngan broă lơh ngan mờ ală cồng nha mờ Học viện ling klàng lơh sơnơm dê neh lơh geh tàm sùm 72 nam bơ̆t bơtàu mờ bơtàu tơnguh.

Ồng Vương Đình Huệ- Chủ tịch Quốc hội còp mờ lơh broă mờ Học viện lơh sơnơm ling klàng

Kuơmàng, tàm broă lơh rơcăng sơndră kòp Covid-19, Học viện lơh sơnơm ling klàng tus bal rcăng lài, jơh nùs, mờ geh cồng nha tàm tơngai do. Chủ tịch Quốc hội sồr Học viện lơh sơnơm ling klàng tơrgùm lơh jăt niam bàr pe tơngume tờm, bè: sền kuơmàng bơto mpồl cau lơh broă jak chài jăt gùng dà gĭt mờ gơrờm bal mờ bồ tơngoh jak chài măy mok mờ rài bơto bơtê jak chài bơh dunia dê; pơn jăt tai tơnguh broă lơh ătbồ mờ tơnguh bơta jak sơm kòp, lơh li la ală broă lơh kham sơm kòp, ai cau kòp lơh tờm; pơgồp bal niam đah sơm kòp mờ kơlôi sơnơng jak chài mờ bơto pơlam bơto bơtê.

Cau mblàng Lơ Mu K’Yến