VOV4.K’ho – Tàm tŭ uă rơndap broă lơh ồs đèng càl tàm Tây Nguyên gam gơtìp kal ke tàm broă ai ù, tơm priă ai ù, mờ uă bơta tam pìt tam phà mờ ờ kơ̆ kơljap bơta lơngap lơngai den tàm kơnhoàl Ea H’Leo, càr Dăk Lăk neh lơh geh cồng nha mờ ală rơndap broă lơh lam lài. Bơta kuơ lơh sa bơh ală rơndap broă lơh dê gơ jat bal mờ bơta kuơ mpồl bơtiàn; loh làng, git iat, lơh jat adat boh lam, hơ̆ là ală bơnàng jă nàng cau bơcri priă, gơnoar atbồ tàm ƀòn lơgar mờ làng bol lơh geh bơta ring bal, dong rơndap broă lơh cèng wơl bơta kuơ lơh sa- mpồl bơtiàn, lơh bơnàng jă mờng chài pơn jat tai gơ hòi gơ jà lam lơh ală rơndap broă lơh ồs đèng càl pơn jat tai, tơnguh bơta pràn bơh càr dê.

Hìu pa lơh ơnàng 100 thơk vuông bơh hìu bơnhă bi Phan Thị Hồng Phượng tàm thôn 5, xã Dliê Yang, kơnhoàl Ea Hleo ơm ngài mờ ală jrong đèng càl bơh Rơndap broă lơh ồs đèng càl Tây Nguyên dê mìng 2, 3 rhiang thơk lơm. Hìu do mùl neh ơm hơ đơng dòr bơnơm ngài lài do, mơya kơnờm rơndap broă lơh ồs đèng càl lơh gùng lòt gan mờ gơ gơs là hìu ơm tàm bă tiah kuơmàng. Ùr bơklau bi Phượng neh ngui bơta ƀuơn pa geh nàng pờ hìu ràng tac phan, tam tai uă bơkàu gùt dar suơn mờ tềng đap hìu nàng drơng nac nhơl chờ in cùp hin, check in ù tiah gùt dar ồs đèng càl: “Bơh ngai rơndap broă lơh geh lơh gơs, làng bol tàm thôn 5 geh dờp kuơ tài geh gùng bê tông lòt rê. Ờ hềt kờp, lài do tàm tiah do ờ huan geh ngan cau tus mơya tŭ do nac nhơl chờ tus uă. Khi lòt sền, cùp hin ală jrong ồs đèng càl mờ ù tiah tàm do. Rài kis tàm do tam gơl uă ngan, jơh ală là kơnờm bơh rơndap broă lơh ồs đèng càl jơh”.

Ală rơndap broă lơh ồs đèng càl geh cèng wơl priă jền lơh geh uă ngan ai kes priă in

Rơndap broă lơh ồs đèng càl Tây Nguyên tàm xã Dliê Yang, kơnhoàl Ea H’Leo là rơndap broă lơh ồs đèng càl sơn rờp tàm càr Dăk Lăk mờ jơh bal gùt tiah Tây Nguyên dê, bơh Tập đoàn HBRE lam lơh bơh nam 2017. Ồng Nguyễn Hoàng Hiệp, Phó Kuang atbồ drơng rơndap broă lơh pà git, rơndap broă lơh geh bơta pràn 28,8 MW, geh 12 jrong turbin, gơ rềng tus broă ai ù tiah mờ phan bơna bơh 84 hìu bơnhă làng bol dê. Do là broă lơh geh uă ngan kal ke. 84 nă cau tờm hìu là 84 jơnau đơs krơi is. Dilah ờ bơsong dipal den rơp gơlik geh tàm pơndrờm, lah yă, lơh gơbàn kòl yan dùl ròt. Mờ bơta lòt bal bơh ală kấp gơnoar atbồ mờ bơta kơ̆ dơn, geh nùs nhơm niam bơh mpồl lơh sa kă bro dê, ală bơta kòl yan mờ kal ke bè ai ù neh geh bơsong. Rơndap broă lơh neh geh lam lơh ƀuơn ƀuài mờ pờ tơlik ồs đèng tàm nhai 11 nam 2019. Ồng Hiệp đơs: “Ủy ban Nhân dân kơnhoàl crơng gơs Mpồl dong kờl ai ù, dong mpồl lơh sa kă bro. Tàm tŭ lam lơh, mpồl lơh sa kă bro pơgồp bal mờ Anih tờm khà ù càr, kơnhoàl dê bơt bơtàu ală rơndpa broă lơh tơm wơl priă ai ù. Jơh khà kờp bè tơm wơl priă ai ù geh lir loh làng. Ủy ban Nhân dân ală xã jat tàm khà kờp jơh hìu bơnhă geh dờp priă tơm wơl ai ù, phan bơna geh tàm ù kàr lơi hơ̆ sồng yal kấp geh gơnoar in ring bal mờ tơnơ̆ hơ̆ lơh nàng jă nàng lam lơh tơm wơl priă ai ù làng bol in”.

Tơnơ̆ cồng nha bơh Rơndap broă lơh ồs đèng càl Tây Nguyên dê, kơnhoàl Ea H’Leo pơn jat tai lam lơh dùl rơndap broă lơh ndai, dờng rlau 14 dơ̆ pơndrờm mờ rơndap broă lơh sơn rờp. Hơ̆ là Rơndap broă lơh hìu măi pờ tơlik ồs đèng càl Ea Nam bơh Tập đoàn Trung Nam bơcri priă.

Jat ồng Nguyễn Văn Hà, Chủ tịch Ủy ban Nhân dân kơnhoàl Ea H’Leo pà git, bơta lòng gơ wèt tus mờ rơndap broă lơh pa là dờng ngan, tài pal bơsong khà broă lơh tàm tŭ tơngai mìng rlau 11 nhai, mờ geh lơh tàm tơngai kòp Covid-19 bơtờp uă tai. Tàm ală kal ke gơ rơndap rơndồl, ngan là bè tơm wơl priă ai ù mờ bơta kơn jơ̆ bè tŭ tơngai lam lơh, cau bơcri priă geh tŭ neh lơh krơi, kờñ lòt blơi tơn ù bơh làng bol dê gam gơlik geh uă ngan tàm ală rơndap broă lơh ồs đèng càl ndai. Kơnờm geh bơta lơh broă bal ngac ngar, jơh nùs bơh ală kấp gơnoar atbồ, mpồl cau dê neh dong mpồl lơh sa kă bro tă bơsong gơtùi bơta kòl yan. Do là bơta mờ uă rơndap broă lơh ndai gam gơtìp, tŭ do gam kal ke ngan nàng bơsong dipal.

Rơndap broă lơh ồs đèng càl Tây Nguyên là rơndap broă lơh ồs đèng tơmut bal mờ gùng che đèng dà lơgar sơn rờp ngan tàm Tây Nguyên

Ồng Nguyễn Văn Hà yal, nàng rơndap broă lơh geh cồng nha, pal kờñ geh cau bơcri priă geh nùs nhơm song dơpă mờ kràñ cê, gơnoar atbồ tàm ƀòn lơgar đơs pal gơ jat bal mờ lơh, kơ̆ dơn jat kơrnuat loh làng, song dơpă, lơh jat jơnau hơ pơrgon. Gơ wèt mờ kơnhoàl Ea H’Leo, hơ̆ là bơnàng jă lài nàng pơn jat tai gơ hòi gơ jà, lam lơh ală rơndap broă lơh ndai, wèt tus tơnguh jơh bơta pràn ồs đèng càl 3 rbô MW bơh kơnhoàl dê: “Tơngai bơh sơn rờp, uă làng bol dră wơl, khi ờ bài lơh bal. Bol hi kung jà ală cau kra ƀòn, cau atbồ ƀòn, bí thư chi bộ, halà cau geh bơngă pin dờn pơgồp bal mờ kuang bàng xã, kơnhoàl tus boh bơr, mblàng lơh loh làng bol in bơta kuơ, bơta he roh bơh rơndap broă lơh dờng càr, kơnhoàl dê. Tŭ mblàng lơh loh, làng bol khi git mờ niam nùs den hơ̆ sồng khi dờp rơndap broă lơh. Tàm kơnhoàl Ea H’Leo bơh lài tus tŭ do ờ hềt gơlik geh bơta tam pìt tam phà bơta kuơ đah làng bol mờ mpồl lơh sa kă bro bơcri priă lơh ồs đèng càl. Hơ̆ là bơta lơh ngan bol hi dê, bơta do neh pơgồp bơnah tàm cồng nha bơh ală rơndap broă lơh ồs đèng càl tàm kơnhoàl dê”.

Tŭ do, Ea H’Leo geh mpờl loh dùl rùp să bơh tiah ồs đèng càl tàm Tây Nguyên bal mờ mờr 100 jrong, pờ tơlik mờr 1 tơmàn 300 tơlak KWh đèng pah nam. Bal mờ tă pơgồp git nđờ rhiang tơmàn đong pah nam ai kes priă càr in, pờ tơlik tai ồs đèng gùt lơgar in, den ală rơndap broă lơh gam lời wơl rlau 60 kơi sồ gùng bê tông drơng rài kis mờ broă lơh sa làng bol in, dong lơh 13 nơm hìu chài rơgơi mờ hìu nùs nhơm... Cồng nha ală rơndap broă lơh ồs đèng càl tàm Ea H’Leo là kơnòm bơta pràn ngan ngồn tơl pràn, kơnòl broă tơl dờng, sùm đơs gơ jat bal mờ lơh, gàr niam đah kơnòl broă mờ bơta kuơ bơh jơh ală gah dê.

Cau mblàng K’Duẩn