VOV4.K’ho- Tơngai do, ală càr Tây Nguyên neh hòi jà geh uă rơndăp broă lơh ồs đèng càl, mờ khà priă bơcri bơh 2, 3 rơbô tơmàn tus git nđờ jơ̆t rơbô tơmàn đong, neh pơgồp bal tàm broă dong kờl GRDP ală càr gàr geh khà gơguh lơh sa. Ală rơndăp broă lơh geh lơh càl gơs ồs đèng mờ ai broă lơh sa dà lơgar in mờ cèng geh git nđờ rơhiang tơmàn đong ai kes priă càr in. Mơya, ală rơndăp broă lơh gam ai geh uă bơta pơlai ngan tus mờ cau bơcri priă lơh, làng bol bal mờ gơnoar atbồ ală cấp in. ală ñjrong ồs đèng càl geh lơh mhar gam lơh gơtìp uă bơta ờ niam.

Kơnhoàl Dăk Song, càr Dăk Nông là tiah geh pơnrơ niam tàm Tây Nguyên bè broă tơnguh bơtàu ồs đèng càl, mờ 6 rơndăp broă lơh, kờp bơta pràn 430 MW, kờp jơh khà priă bơcri rơlao 15 rơbô tơmàn đong. Mơya tàm tiah do kung gam gơtìp ală tiah geh uă bơta ờ niam bè bơta lơngăp lơngai, ờ do ờ dă mpồl bơtiàn, mờ ală dơ̆ tam phà sồr tơm ntrờn ù tiah gơtìp kal ke. Làng bol sùm tơrgùm gal cau mờ geh uă broă lơh, lơh kal ke tus mờ broă lơh.

                                    Dùl broă lơh ồs đèng càl gam geh lơh tàm càr Gia Lai

Tàm khà git nđờ jơ̆t nă cau tus bal tam phà, bi Dương Văn Chương (kòn cau Dao), kis tàm ƀòn Đăk Thốt, xã Thuận Hà ai geh tơngu me geh nùs nhơm pin dờn ờ di pal: “Añ lơh 4 nơm tờm gle hơ̆ nàng sền gàr rơkàng hìu, tài nùs nhơm pin dờn, bơhiàn kòn cau bol añ dê là ờ geh ai ală phan lòs lòt gan rơkàng hìu mờ tàm hìu geh jơnang duh khoai mò ồng. Di lah đah lơh ồs đèng càl kờñ tă sờr ñjrong do den pal geh cri bơyai, nàng añ hòi cau bơjơu tus trang sền, nàng yal mờ mò ồng mờ lơh yàng tai”.

Jăt ală cau tờm bơcri priă lơh ồs đèng càl tàm Dăk Song yal, bal mờ broă kơrian rơndeh, lơh kal ke broă lơh nàng dan “tơm ntrờn-dong kờl”, làng bol gam lơh git nđờ rơhiang nơm hìu tàm tiah mờ mpồl lơh sa kă bro gam cri bơyai ring bal nàng dan priă tơm ntrờn ờ di pal rơlao. Ồng Nguyễn Văn Tuấn, Kuang atbồ Công ty TNHH MTV năng lượng Dăk Ndrung pà git, broă lơh bơh mpồl lơh sa kă bro tŭ do là kal ke ngan: “Geh ală gùng che ồs đèng, neh geh ring bal tơm ntrờn gơs, mơya tus ngai tơnơ̆ den làng bol hào tă che tơmù nàng kờñ lơh kal ke mpồl lơh sa kă bro in, tàm tŭ là khà priă dong kờl neh geh ring bal bơh gơnoar atbồ tàm do, mpồl lơh sa kă bro mờ mpồl lơh broă pơn diang”.

                                                                        Tàm tiah lơh ồs đèng càl

Bơh quý 1 nam do, anih yal tơngit jơnau mpồl bơtiàn neh yal uă bè ală bơta kal ke adăt boh lam tài ală rơndăp broă lơh geh lơh tŭ ờ hềt geh tam gơl broă ngui ù, ngui uă cau lơh broă lơgar bơdìh mờ geh sră geh ai, gam gơnoar atbồ tàm do den ờ git bơta lơi. Tàm càr Gia Lai, do là tiah geh 16 rơndăp broă geh lơh, kuang đơng lam Sở Công thương càr mblàng là: do ndrờm là ală rơndăp broă lơh cấp 1, geh Bộ Công thương atbồ, cau bơcri priă lơh ồs đèng càl gơlơh bè bơdìh mờ bơta sền gròi, blơi is ù, bơsong is broă tơm ntrờn. Ồng Phạm Văn Binh, Kuang atbồ Sở Công thương càr Gia Lai pà git, geh uă ală mpồl lơh sa kă bro tơm ntrờn jăt khà priă geh ai, mơya kung geh ờ uă tiah geh tơm ntrờn sơrlèt mờ khà priă geh ai, lơh gơtìp ờ niam tus mờ gơnoar atbồ tàm do: “Bè añ lơh broă mờ UBND kơnhoàl Chư Pưh, den kơnhoàl đơs là ală mpồl lơh sa kă bro ồs đèng càl gam tơm ntrờn nàng mhar, nàng geh jăt jơnau kờñ. Mơya tŭ do pal bơsong geh jơnau do hơ̆ sồng tơnơ̆ do tai, ală broă lơh kơnhoàl dê, tàm hơ̆ uă ngan là ală broă lơh tàm tiah kal ke, mờ ngui khà priă tơm ntrờn bơh mpồl lơh sa kă bro dê den bol añ gơtìp kal ke ngan tàm broă tơm ntrờn ù tiah”.

Broă ờ niam bè bơta lơngăp lơngai tàm ală tiah geh lơh ồs đèng càl gam là mùl màl kal ke ngan. Làng bol tơnguh sùm jơnau sồr tàm broă tơm ntrờn ù tiah, gam mpồl lơh sa kă bro neh hòi jà ală cau geh sền là “oh mi lơh broă mpồl bơtiàn” nàng bơsong broă tam phà. Ală mpồl cau do dong kờl mpồl lơh sa kă bro mờ broă rồn bơklơn, geh tŭ lơh làng bol. Tàm kơnhoàl Dăk Song, càr Dăk Nông neh geh ală dơ̆ tam lơh, lơh gơtìp sồt să; gam tàm ƀòn dờng Pleiku, càr Gia Lai, kung geh uă dơ̆ yă bơh làng bol dê bè broă gơtìp pơhìn, geh tŭ gơtìp ƀồm nhơm hòi tŭ lik bơdìh hìu. Jăt ồng Lê Trọng Yên, Phó Chủ tịch UBND càr Dăk Nông yal, do là neh lơh ngan tus bal nàng bơsong geh ờ uă tiah tam phà. Mơya di lah ală cau tờm bơcri priă gam pơn jăt tai lơh broă ờ niam, gơnoar atbồ tàm do ờ lơh broă nền nòn den broă tam lơh gam jŏ jòng: “Cau tờm bơcri priă nđan lah ờ tus bal nàng cri bơyai jơnau lơi, nàng đơs loh, nàng làng bol lơh jăt bal. Gơnoar atbồ tàm do den ală kuang bàng mìng hòi, đơs gời. mơya jơnau lam sồr den ală kuang bàng mìng ơm hờ bơdìh. Tàm mpồl lơh broă chính trị mờ lơh bè hơ̆ den ờ gơtùi ngan”.

9 nhai do, bŭ lah jơh ală gah lơh sa gơtìp kal ke tài kòp Covid-19, mơya tă dia tàm kes priă dà lơgar tàm ală càr Gia Lai, Dăk Lăk, Dăk Nông gam sơrlèt rơlao mờ rơndăp broă geh ai. Mờ 28 rơndăp broă lơh ngan geh lơh, kờp jơh bơta pràn mờr 2 rơbô 300MW, kes priă 3 càr do tă geh rơlao 1 rơbô 100 tơmàn đong. Di lah ală rơndăp broă lơh gơs di tơngai mờ ai geh pờ tơlik ồs đèng, ală rơndăp broă lơh geh pơn jăt tai tă pơgồp tơl càr git nđờ rơhiang tơmàn đong priă dia pah nam. Mơya sơlơ jal mhar, lơh dang den ală rơndăp broă sơlơ lơyài. Bè rơndăp broă Dăk Ndrung 1, 2, 3 tàm kơnhoàl Dăk Song, càr Dăk Nông, rơlao 70% khà ñjrong tourbin kung gam ờ hềt geh lơh tài kal ke tàm broă tơm ntrờn ù tiah. Tàm càr Gia Lai, ală rơndăp broă lơh ồs đèng càl di gơlan geh niam rơlao, mơya broă lơh gùng che ồs đèng nàng tơmŭt bal tàm gùng che ồs đèng dà lơgar kung gơtìp uă kal ke ndrờm bal sơl. Ală càr Tây Nguyên gam lơh ngan nàng dong kờl ală cau bơcri priă lơh bơsong kal ke, chồl mhar broă lơh ală rơndăp broă. Mơya broă lam sồr làng bol ring bal mìng geh cồng nha tŭ mpồl lơh sa kă bro ồs đèng càl lam lài tàm broă lơh jăt adăt boh lam mờ pơgồp bal niam mờ gơnoar atbồ tàm ală tiah.

Cau mblàng Ndong Brawl