VOV4.K’ho- Mho òr (30/08), tàm ƀòn dờng Hồ Chí Minh, Phó Thủ tướng ồng Vũ Đức Đam bal mờ mpồl kuang bàng lơh broă kuơ màng bơh Chính phủ bè broă lơh jăt broă rơcang sơndră mờ kòp Covid-19 neh sền broă kham, pà sơnơm sơm kòp ai cau kòp Covid-19 gam tam cah is, sơm kòp tàm hìu in.

Tơnơ̆ mờ tŭ neh sền tàm Quận 11 mờ Quận 8, Phó Thủ tướng ồng Vũ Đức Đam sồr tơnkah mùl màl pa do tàm ală quận geh ală cau F0 gơtìp jroă mhar mơya ờ geh broă tus kham, gŏ di tŭ den tàng neh chơ̆t tàm hìu. Den tàng, ala mờ broă mìng hòi điện thoại, mpồl ling klàng lơh sơnơm pal pơgồp bal mờ gah lơh sơnơm tàm quận nàng sùm tus còp mờ kham cau F0, tàm hơ̆ uă ngan là ală hìu nhă ờ geh cau kơnòm, pràn nàng sền gàr cau kòp. Phó Thủ tướng ồng Vũ Đức Đam sồr tàm 1 ngai mang tus, mpồl lơh sơnơm ling klàng pal tơrgùm, yal bè broă ai sơnơm sơm kòp cau F0 in. Di lah geh sơnơm mơya ờ hềt tus mờ ală cau F0 den pal ntrờn mơ, di lah ờ tơl den pal blơi bơtơl mơ.

Cau mblàng Ndong Brawl