VOV4.K’ho - Jăt broă lơh bơh pơrjum dơ̆ 2 Quốc hội khoă 15, drim do (22/10), ală kuang bàng iăt Bộ trưởng Bộ Tài chính ồng Hồ Đức Phớc, dờp gơnoar sồr bơh Thủ tướng Chính phủ yal jơnau yal bè broă rơndăp lơh adăt Kă bro bảo hiểm (tam gơl) mờ Bộ trưởng Bộ Kế hoạch mờ Đầu tư ồng Nguyễn Chí Dũng, dờp gơnoar sồr bơh Thủ tướng Chính phủ yal jơnau yal bè broă rơndăp lơh Nghị quyết bè ờ uă cơ chế, broă lơh krơi is tơnguh bơtàu bơh ală càr, ƀòn dờng; Hải Phòng, Nghệ An, Thanh Hoá mờ Thừa Thiên Huế (uă ngan 20 phút).

Pơn jăt mờ hơ̆, Quốc hội geh iăt jơnau yal lùp sền ală tơngu me do. Mho òr (21/10), dùl tàm ală tơngu me kuơ màng geh ală kuang bàng cri bơyai tàm mpồl là broă lơh jăt broă dong kờl, broă lơh bảo hiểm xã hội, broă atbồ mờ ngui Kes priă bảo hiểm xã hội nam 2020. Ală kuang bàng quốc hội mờ cau jăk chài ndrờm đơs là: pal geh broă lơh nàng tơnguh cồng nha ngui bơh ală kes priă Bảo hiểm xã hội, Bảo hiểm roh broă lơh tŭ do neh geh tus khà 953 rơbô tơmàn đong. Bal mờ hơ̆, pal lơh glài nền nòn broă dô pleh, lơyài tă priă Bảo hiểm Xã hội.

Cau mblàng Ndong Brawl