VOV4.K’ho- Drim ngai 01/11, Phó Thủ tướng ồng Lê Văn Thành neh đơng lam pơrjum pờ tơn tàm internet bè broă lam lơh broă ai ù lơh broă mờ bơcri priă lơh Rơndap broă lơh ƀlàng rơndeh par dunia Long Thành, càr Đồng Nai. Jơnau yal bơh Bộ Giao thông Vận tải dê pà git, tus tŭ do, broă ai ù lơh ƀlàng rơndeh par dunia Long Thành tàm khà 5 rbô lồ neh ai wơl geh rlau 3 rbô 800 lồ, geh mờr 77% broă rơndap lơh. Bơnah bơcri priă lơh kơlik, pơng gàr rềp nhàr geh 75% khà broă lơh.

Rùp sềr rơndap broă lơh ƀlàng rơndeh par dunia Long Thành

Đơs pơn dut pơrjum, Phó Thủ tướng ồng Lê Văn Thành pà git, do là rơndap broă kuơmàng ngan lam lơh jŏ jòng bè bơtàu tơnguh gah gùng lòt. Ală Nghị quyết bơh dà lơgar dê ndrờm đal git là broă lơh kuơmàng mờ pal lơh gơs tàm nam 2025. Tŭ broă lơh geh lơh gơs den geh lơh gơlik muh mat pa ai gah gùng rơndeh par in, tơrmù ƀà bơta kơn jơ̆ ai ƀòn dờng Hồ Chí Minh in mờ là bơta pràn pơn jờng bơtàu tơnguh lơh sa bơh jơh gùt tiah do dê, ngan là bơh càr Đồng Nai dê. Bè hơ̆ den tàng pal lơh gơs di mờ tŭ tơngai hơ pơrgon ai tơlik. Tềng đap mat pal lơh gơs lài jơh broă lơh cò tơnring ù jat sră wac sềr broă lơh bơh Bộ Giao thông Vận tải dê nàng bồ nhai 1 nam 2022 geh lam lơh.

Cau mblàng K’Duẩn