VOV4.K’ho- Drim ngai 18/11, tàm Hà Nội, Bộ Lao động, Thương binh mờ Xã hội bơyai lơh tơngkah kir sơnrai Ngai cau pơgru Việt Nam (20/11) mờ dờp Huân chương Lao động khà dùl bơh Tổng cục bơto broă lơh dê.

Phó Chủ tịch lơgar mò Võ Thị Ánh Xuân jàu Huân chương Lao động khà dùl ai Tổng cục bơto broă lơh in

Nam bơsram pa do, kòp Covid-19 neh lơh gơbàn ală bơta ờ niam, gơ rềng uă ngan tus gah bơto bơtê broă lơh mờ broă lơh, uă càr, ƀòn dờng ơm yah ngài mpồl bơtiàn neh gơ rềng uă ngan tus broă lơh bơto bơtê mờ bơsram bơh rlau 1 rbô 900 hìu bơsram bơto broă lơh tàm gùt lơgar dê. Bulah bè hơ̆, ală hìu bơsram bơto broă lơh tàm gùt lơgar neh rơcang lài, ngac ngar gơ dờp, tam gơl bơta bơh bơto bơsram tơn gơs bơto bơsram pờ tơn tàm internet. Ală cau pơgru neh bơsong kal ke, rơcang lài lam lơh ring bal, jơh nùs ală broă lơh mờ gam rơcang sơndră kòp geh cồng nha. Tàm dơ̆ bơyai lơh, ala mat kuang đơng lam bồ Đảng, dà lơgar, Phó Chủ tịch lơgar mò Võ Thị Ánh Xuân neh jàu Huân chương Lao động khà dùl ai Tổng cục bơto broă lơh, Bộ Lao động, Thương binh mờ Xã hội in.

Cau mblàng K’Duẩn