VOV4.K’ho - Phó Chủ tịch lơgar mò Võ Thị Ánh Xuân bal mờ mpồl kuang bàng lơh broă pa tus còp, pà phan tềng anih sền gròi rơcang sơndră mờ kòp Covid-19 jăt gah dà lềng mờ anih sền gròi rơcang sơndră mờ kòp gơtờp tàm gơl gùng nhàr dà lơgar tàm ù gờl gơwèt pôs ling sền gàr tiah mpồng nhàr dà lơgar dunia Hà Tiên mờ lơh broă mờ kuang đơng lam càr Kiên Giang bè broă sơndră mờ kòp Covid-19.

Phó Chủ tịch lơgar mò Võ Thị Ánh Xuân lơh broă tàm càr Kiên Giang bè broă rơcang sơndră mờ kòp Covid-19

Tàm ală anih tus còp, Phó Chủ tịch lơgar mò Võ Thị Ánh Xuân ndrờm còp să, rài kis, broă lơh mờ broă lơh jăt kơnòl bơh kuang bàng, cau ling tus bal tàm ală anih sền gròi kòp tàm tiah sơnrờp nhàr dà lơgar. Phó Chủ tịch lơgar pơn jờng mờ đơs niam broă lơh ngan tơmù ală kal ke bơh ală mpồl rơcang sơndră mờ kòp Covid-19 tàm Hà Tiên dê; kơ̆p kờñ ală mpồl lơh broă pơn jăt tai sơrlèt mờ kal ke, lơh ngan lơh gơs kơnòl. Phó Chủ tịch lơgar sồr càr Kiên Giang pal rơcang lài rơlao tai tàm broă ai phan lơh broă, bơta phan geh tơl mờ mpồl cau lơh broă nàng lơh jăt kơnòl rơcang sơndră mờ kòp tàm bơta pa.

Cau mblàng Ndong Brawl