VOV4.K’ho- Drim ngai 26/11, tàm Gơlăng Chủ tịch, Phó Chủ tịch lơgar mò Võ Thị Ánh Xuân tus bal bal pơrjum Mpồl duh broă kes priă sền gàr mờ dong kờl kơnòm dềt Việt Nam. Bơh bồ nam tus tŭ do, kes priă sền gàr mờ dong kờl kơnòm dềt Việt nam neh dong kờl rlau 98 rbô dơ̆ kơnòm dềt mờ kờp jơh priă tă dong kờl rlau 61 tơmàn đong. Tàm hơ̆ neh bơyai lơh kham, rơ wah kòp plai nùs bơh pa deh, kuet kơlte jơng tê, kòp bè mat ai 1 rbô 200 nă kơnòm dềt jơi bơtiàn kòn cau dùl êt nă cau, kơnòm dềt gơ wèt hìu bơnhă rƀah, hìu bơnhă ndrờm bè cau rƀah tiah kơh bơnơm.

Priă tă dong kờl mờr 6 tơmàn 900 tơlak đong, mờ rlau 20 rbô nă kơnòm dềt geh dong kờl. Kuơmàng, tài gơ rềng bơh kòp Covid-19, kes priă neh dong kờl rlau 18 tơmàn đong ai rlau 14 rbô nă kơnòm dềt in. Cau geh dờp dong kờl là kơnòm dềt geh rài kis uă kal ke halà kơnòm dềt gơ wèt hìu bơnhă rƀah, hìu bơnhă ndrờm bè cau rƀah, kơnòm dềt là kòn bơh công nhân, cau lơh broă sa gơtìp roh broă lơh mờ kơnòm dềt pa deh geh mè bơtờp kòp Covid-19. Phó Chủ tịch lơgar mò Võ Thị Ánh Xuân tàm dơ̆ pơrjum neh hòi jà ală kuang geh jơng tàm Mpồl duh broă sền gàr mờ dong kờl tơnguh rlau tai gơnoar broă he dê nàng hòi jà bơta pràn niam ngan rlau jơh dong kờl ai kơnòm dềt geh rài kis kal ke in.

Cau mblàng K’Duẩn