VOV4.K’ho- Tềng đap broă gơlik geh kal ke bơh kòp dờng, trồ tiah lơh aniai, sồr ală kấp ủy Đảng, gơnoar atbồ tàm kấp hơđơm càr Quảng Ngãi pal jơh nùs tàm broă đơng pơlam, lam lơh jat ală broă lơh ngac ngar nàng bơtàu tơnguh lơh sa mpồl bơtiàn. Do là jơnau đơs đơng lam tàm drim ngai 17/11 bơh Thượng tướng Trần Quang Phương, Phó Chủ tịch Quốc hội tàm pơrjum dơ̆ 5, Hội đồng Nhân dân càr Quảng Ngãi khóa 13, tơngai lơh broă bơh nam 2021 tus nam 2026.

Pơrjum lồi nam do tơrgùm cribơyai, ring bal 9 Nghị quyết, lam lơh jat ngan ngồn ală jơnau sồr bơh dà lơgar, Ban Thường vụ Tỉnh ủy, Ban Chấp hành Đảng bộ càr dê tàm bơta geh ngan bơh càr dê. Đơs tàm dơ̆ pơrjum do, Thượng tướng Trần Quang Phương, Phó Chủ tịch Quốc hội đơs là, càr neh geh ală broă lơh nền dipal, di tŭ bơsong ală broă ờ suk bơh bơta geh ngan, sền gròi bơsong ală broă gơ rềng tus rài kis, lơngap lơngai rài kis mpồl bơtiàn, ƀơ̆ ƀơl tiah ơm kis. Phó Chủ tịch Quốc hội kơp kờñ, càr geh lơh geh ală cồng nha niam rlau tai tàm tơngai tus.

Cau mblàng K’Duẩn