VOV4.K’ho- Mho ngai 17/11, Phó Chủ tịch Thường trực Quốc hội ồng Trần Thanh Mẫn bal mờ kuang bàng Quốc hội khóa  15 càr Hậu Giang geh dơ̆ tìp mat cau tĕ khà ƀòn dờng Vị Thanh, kơnhoàl Vị Thủy, Châu Thành mờ Châu Thành A. Tàm dơ̆ tìp mat, cau tĕ khà ai tơnggŏ bơta ring bal, đơs niam cồng nha pơrjum dơ̆ 2, Quốc hội khóa 15; mờ kung geh jơnau đơs, jơnau dan tus ală kuang bàng Quốc hội uă broă.

Phó Chủ tịch Quốc hội ồng Trần Thanh Mẫn đơs tàm dơ̆ tìp mat

Đơs tàm dơ̆ tìp mat, Phó Chủ tịch Thường trực Quốc hội ồng Trần Thanh Mẫn cih dờp mờ jờng rơ ală cồng nha mờ càr Hậu Giang neh lơh geh tàm tơngai lài, mờ kung tam pà bè ală kal ke, bơta lòng gơ rềng tus broă lơh sa mpồl bơtiàn tàm càr. Bè 2, 3 jơnau dan bơh cau tĕ khà dê gơ wèt tus mờ gah lơh sơnơm, Phó Chủ tịch Thường trực Quốc hội yal, Chính phủ geh ai tơlik broă rơndap lơh bal bè rơcang sơndră kòp Covid-19, kơlôi sơnơng, sền sơ wì ai 2, 3 bơta phan bơna, măi mok lơh sơnơm mut tàm mat phan geh gròi sền bè khà priă, gàr kơ̆ kơljap khà priă. Geh broă lơh geh cồng nha nàng hời rơ hời tơrmù bơta gơ lin bè bơta niam kham sơm kòp đah ală kấp, ală tiah.

Cau mblàng K’Duẩn