VOV4.K’ho- Ngai 9/6, ồng Phạm S- Phó Chủ tịch UBND càr Lâm Đồng neh lòt sền broă lơh rcang sơndră kòp Covid-19 tàm ù tiah ală kơnhoàl Đức Trọng, Lâm Hà. Tàm kơnhoàl Đức Trọng, mpồl neh lòt sền, sền gròi anih sền gròi kòp Covid-19 lơh tàm ƀlàng rơndeh par Liêng Khang (thị trấn Liên Nghĩa) mờ tàm gùng dờng 28B xã Ninh Loan, rềp nhàr bal mờ càr Bình Thuận. Bơh broă lòt sền, ồng Phạm S neh cih dờp broă lơh anih kơryan kòp bơh ală mpồl lơh broă dê tàm anih sền gròi lơh niam ngan, jơh nùs mờ lơh geh tơl bơta, jơnau bơto pơlam làng bol yal  tiah lòt rê mờ gah lơh sơnơm bè rcang sơndră kòp Covid-19 tŭ lòt gan ală anih sền gròi.

Tàm kơnhoàl Lâm Hà, jat jơnau yal bơh Kuang đơng lam bồ kơnhoàl, broă lơh rcang sơndră kòp Covid-19 tàm ù tiah kơnhoàl dê neh geh lơh jat niam mờ lơh kràñ jat ală jơnau tàm sră nggal sồr lơh bơh Dà lơgar mờ càr dê. Ồng Phạm S sồr kơnhoàl Lâm Hà pơn jat tai lơh jat jơnau tàm sră nggal sồr pa ngan rlau jơh bơh Dà lơgar mờ càr dê; tàm hơ̆ geh ală bơta pa bè tiah ai ơm yah ngài jat Chỉ thị sồ 15 mờ tiah ai ơm yah ngài jat Chỉ thị sồ 16 den kơnhoàl, xã kung kờñ pal sền gròi.

Cau mblàng K’Hạnh