VOV4.K’ho - Lồi ƀùi mho òr (27/12), Tềng hìu Quốk hội, Ủy viên Ƀộ Cíñ trị, Phó chủ tịch Thường trựk Quốk hội ồng Trần Thanh Mẫn tìp măt 55 nă cau tus pơrjum dờng geh pơnrơ jăk “Tài cau gơtìp sơnơm khih” dơ̆ 4, tơngai bơh nam 2021 tus 2026.

Tơnơ̆ mờ tŭ iăt jơnau yal mờ jơnau pơgồp bal bơh ală kwang bàng đơsa tàm dơ̆ tìp măt, Phó củ tịc Thường trựk Quốk hội ồng Trần Thanh Mẫn đơs tờm, dơ̆ tam dră hoá học geh lơgar Mỹ lơh tàm rài tam lơh tàm lơgar Việt Nam neh lơh 4 tơlăk 800 rơbô nă cau lơgar Việt Nam gơtìp aniai mờ di pơgăp rơlao 3 tơlăk nă cau là cau gơtìp sơnơm khih lơh aniai. Broă bơsong mờ tơmù hoàc huơr bơh sơnơm khih lơh aniai tơnơ̆ mờ rài tam lơh là kơnòl geh lơh mhar mờ jŏ jòng, geh bơta dong kờl kòn bơnus uă, là kơnòl bơh gùt mpồl bơtiàn, nàng ưn ngài gơwèt mờ cau lơh broă tam lơh gơtìp sơnơm khih hoá học mờ cau gơtìp sơnơm khih Việt Nam.

Phó củ tịc Thường trựk Quốk hội sồr kấp ủy Đảng, gơnoar atbồ ală kấp mờ mpồl lơh broă cíñ trị pơn jăt tai lơh jăt ală broă lơh bơh Đảng, Dà lơgar gơwèt mờ cau gơtìp sơnơm khih; ai tơl ală bơta niam nàng Mpồl cau gơtìp sơnơm khih dioxin ală kấp lơh gơs kơnòl Đảng, Dà lơgar jào tàm rài pa.

Cau mblàng Ndong Brawl