VOV4.K’ho- Đơng lam pơrjum mhar pờ tơlik tơn tàm internet sơndră wơl mờ mìu càl rơbŭt dờng sồ 6 geh bơyai lơh mho ngai 23/9, tàm Hà Nội. Phó thủ tướng Chính phủ ồng Lê Văn Thành- Kuang atbồ Mpồl đơng lam dà lơgar bè rcang sơndră trồ tiah lơh aniai- Chủ tịch Ủy ban dà lơgar rcang sơndră trồ tiah lơh aniai mờ lòt jòi dong kờl rềs àr sồr, ală tiah bañ sền ờ sơ̆p mờ ờ rcang sền ngăc tàm broă rcang sơndră, pal gàr niam bơta ờdo ờdă màng kis làng bol dê ngan là tàm tơngai kòp Covid-19 gơlik geh kal ke bè tŭ do.

Jơnau yal mhar bơh Mpồl đơng lam dà lơgar bè rcang sơndră trồ tiah lơh aniai pà gŏ, tŭ do kung gam 21 nơm ơhò, plung bơh càr, ƀòn dờng bè: Đà Nẵng, Bình Định, Quảng Ngãi gam ơm tàm tiah ngòt rơngơ̆t, mpồl ling sền gàr tiah nhàr dà lơgar tàm dà lềng neh bal mờ hìu bơnhă ală cau tờm ơhò sùm tàm yal tơngĭt, hòi jà ală ơhò, plung ntrờn rê tàm tiah ờdo ờdă. Phó Thủ tướng ồng Lê Văn Thành sồr ală tiah bè Đà Nẵng, Quảng Nam mhar bơto pơlam ală ơhò, plung lik bơh tiah ngòt rơngơ̆t bơh mìu càl rơbŭt dờng dê. Mơkung pal sền gròi ngan gàr niam bơta ờdo ờdă làng bol tàm ală tiah geh bơta pơhìn uă bè dà kŏ dà cò, tơrlah ù kung bè rcang lài gùng dà broă lơh ntrờn làng bol, gàr niam bơta ờdo ờdă bè kòn bơnus mờ phan bơna, mơkung gàr niam bơta ờdo ờdă tàm broă rcang sơndră kòp Covid-19.

Cau mblàng K’Hạnh