VOV4.K’ho- Ngai 15/10, tàm Hà Nội, neh bơyai lơh dơ̆ tơngkah kir sơnrai 91 nam Ngai crơng gơs Mpồl tam klăc cau ùr Việt Nam (20/10) mờ jàu khà jờng Cau ùr Việt Nam.

             Phó Thủ tướng ồng Phạm Bình Minh tus bal tàm dơ̆ jàu khà jờng Cau ùr Việt Nam

Tus bal mờ đơs tàm dơ̆ jàu khà jờng,  Phó Thủ tướng Thường trực Chính phủ ồng Phạm Bình Minh gờm chờ ală mpồl cau, cau dùl nă să is lơh geh khà jờng Cau ùr Việt Nam. Tơngŏ bơta kơ̆p kờñ tàm tơngai tus ală mpồl cau, cau dùl nă să is chờ hờp dờp khà jờng do pơn jat tai geh tai bơta kờñ ngan, kơ̆p kờñ bơceh pa, tam gơl pa, lơh geh ală mat kă bro Việt Nam cèng bơngă dà lơgar dê. Phó Thủ tướng ồng Phạm Bình Minh sồr ală Bộ, gah sơnah lơh broă, ală tiah sền gròi, lơh jat niam rlau tai ală broă lơh gơwèt mờ bơta bơtàu tơnguh bơh cau ùr dê mờ cau ùr sơnđờm mut lơh broă đơs is. Ală kấp Mpồl pơn jat tai bơceh pa, pờ ơnàng tàm tơrbŏ bal, rcang lài lơh broă bal mờ ală bộ, gah sơnah lơh broă, ală mpồl lơh sa kă bro nàng lam lơh geh cồng nha rlau tai rơndap broă lơh “Dong kờl cau ùr sơnđờm mut lơh broă”. Nàng ngai sơlơ geh uă mpồl cau, cau dùl nă să is cau ùr sơnđờm mut lơh broă geh cồng nha.

Cau mblàng K’Hạnh