VOV4.K’ho- Đơs tàm dơ̆ pơrjum tàm jàu broă lơh pờ tơlik tơn tàm internet Mpồl đơng lam rcang sơndră kòp Covid-19 tàm ƀòn dờng Hồ Chí Minh ngai 2/7, ồng Trương Hoà Bình- Phó Thủ tướng Chính phủ sồr ƀòn dờng Hồ Chí Minh kờp sền wơl ală Jơnau sồr ờdo ờdă rcang sơndră kòp tàm jơh ală gah, tiah, ù tiah nàng yal mờ lam lơh geh cồng nha tàm tơngai pa, lơh ngan tus lồi nhai 7 nam 2021, kòp gơmù loh làng, tơrmù uă mờ tus nhai 8 nam 2021 digơlan geh kơryan kòp.

Jat Phó Thủ tướng Chính phủ ồng Trương Hoà Bình đơs, ală quận, kơnhoàl tàm ƀòn dờng rcang lài jat tàm bơta gơlik geh bơh bơta kòp tàm tơl tiah atbồ nàng tam gơl gùng dà broă lơh ai ơm yah ngài mpồl bơtiàn nàng gơ in di pal; gơtùi  pơn jat tai lơh jăt Chỉ thị sồ 10 bơh UBND ƀòn dờng Hồ Chí Minh dê halà dan lơh jăt Chỉ thị sồ 16 bơh Thủ tướng Chính phủ dê dilah sền gŏ ngan ngồn kờñ pal mut ngui. Bơdìh mờ hơ̆, pal lơh jat niam kơnòl broă bơh Mpồl đơng lam rcang sơndră kòp Covid-19 dê tàm ală quận, kơnhoàl, mpồl Covid-19 mpồl bơtiàn bơh broă lam lơh broă lòt sền, sền gròi mờ lơh glài ală cau lơh tìs jơnau sồr rcang sơndră kòp bơh ƀòn dờng dê.

Cau mblàng K’Hạnh