VOV4.K’ho - Drim òr (01/12), tàm Hà Nội geh bơyai lơh Pơrjum dờng kuang bàng ala măt gùt lơgar Mpồl pơlam dong kờl broă bơsram sră Việt Nam dơ̆ 6 mờ tơnkah 25 nam ngai crơng gơs mpồl. Phó Thủ tướng ồng Vũ Đức Đam tus pơrjum.

25 nam do, Mpồl pơlam dong kờl broă bơsram sră Việt Nam neh tam gơl pa sùm, hòi jà ală bơta pràn tơnguh bơtàu Kes priă pơlam dong kờl broă bơsram sră, jào git nđờ tơlăk khà priă bơsram ai kơnòm dềt, ală cau pơgru mờ kơnòm bơsram in, dong kờl kơnòm bơsram rơƀah sơrlèt mờ kal ke bơsram jăk rơlao. Tàm pơrjum dờng, Phó Thủ tướng ồng Vũ Đức Đam đơs tờm, tơngai do, broă bơto bơtê tàm ală cấp bơsram neh rơhời geh gơguh jăt bal tàm dunia, bơta do pà gŏ gùt Đảng mờ làng bol neh sền gròi tus mờ broă bơsram sră. Phó Thủ tướng ồng Vũ Đức Đam sồr: Mpồl pơlam dong kờl broă bơsram sră Việt Nam pơgồp bal mờ ală Bộ lơh gơs ală broă lơh nàng lơh jăt broă tam gơl pa tơl ală bơta broă bơto bơtê mờ bơsram Đảng neh geh ai. Phó Thủ tướng ồng Vũ Đức Đam pin dờn mờ broă pơn jăt tai bal mờ tơnguh bơtàu, Mpồl geh pơn jăt tai dờng pràn mờ pơgồp bal kuơ màng tàm broă bơ̆t bơtàu mờ sền gàr Dà lơgar.

Cau mblàng Ndong Brawl