VOV4.K’ho- Mho ngai 28/12, Phó Thủ tướng Cíñ phủ ồng Lê Văn Thành neh lòt sền ù tiah ngan ngồn mờ lơh broă mờ càr Lâm Đồng bal mờ ală Ƀộ, gah broă lơh geh gơ rềng bè broă rơcang tă priă lơh Rơndap broă lơh gùng rơndeh ntoat rat gơl Tân Phú, càr Đồng Nai – Bảo Lộc, càr Lâm Đồng mờ Bảo Lộc- Liêng Khàng. Rơndap broă lơh gùng rơndeh ntoat rat gơl Tân Phú- Bảo Lộc jòng 66 kơi sồ, tàm hơ̆ 11 kơi sồ gơ wèt ù tiah càr Đồng Nai mờ 55 kơi sồ gơ wèt ù tiah càr Lâm Đồng. Do là dùl tàm 3 rơndap broă dềt bơh Rơndap broă lơh gùng rơndeh ntoat rat Dầu Giâng- Liêng Khàng dê. Rơndap broă geh tam pà broă bơcri priă gơs 2 tơngai, kờp dŭ lơh gơs mờ ai ngui tàm nam 2025.

Đơs tàm dơ̆ lơh broă, Phó Thủ tướng Cíñ phủ ồng Lê Văn Thành đơs niam broă càr Lâm Đồng neh rơcang lài broă tă pơgồp priă bơcri bơh mpồl bơtiàn dê bơh ală mpồl lơh sa kă bro mờ dùl bơnah priă bơcri càr dê, ờ ngui kes priă dà lơgar tŭ lam lơh bơcri priă lơh rlau 140 kơi sồ gùng rơndeh ntoat rat. Mờkung sồr ală Ƀộ, gah broă lơh geh gơ rềng tơrgùm dong kờl ală càr tă bơsong kal ke, lơh gơs ală sră nggal jat jơnau sồr nàng gờñ lam lơh, ai ală gơl gùng rơndeh ntoat rat lơh broă jat broă rơndap lơh.

Cau mblàng K’Duẩn