VOV4.K’ho- Drim ngai 15/12, tàm hìu lơh broă Cíñ phủ, Phó Thủ tướng ồng Lê Văn Thành đơng lam pơrjum pờ tơlik tơn tàm internet sền sơ wì, chul chồl tă bơsong kal ke, kòl yan, chồl pràn tă priă bơcri dà lơgar nam 2021. Jat jơnau yal bơh Ƀộ Tài cíñ dê, gơ wèt mờ 12 Ƀộ, anih lơh broă dà lơgar mờ kấp hơ đơm gơ wèt cau geh sền sơ wì, kờp tus ngai 30/11/2021 neh tă geh mờr 28 rbô tơmàn đong, mìng rơp geh 36%. Ờ uă Ƀộ, anih lơh broă dà lơgar mờ kấp hơ đơm geh khà tă priă bơcri lơyah bè Ƀộ Kông thương, Ƀộ Xây dựng, ƀòn dờng Hồ Chí Minh...

Kuơmàng, kung gam 2, 3 Ƀộ, anih lơh broă dà lơgar mờ kấp hơ đơm ờ hềt tam pà jơh broă rơndap lơh priă bơcri geh jàu. Gơ wèt mờ priă bơcri geh tă bơh kes priă càr, ƀòn dờng dê, gam 12 càr, ƀòn dờng ờ hềt tam pà jơh broă rơndap lơh geh Thủ tướng Cíñ phủ jàu. Tàm dơ̆ pơrjum, ală ƀộ, anih lơh broă dà lơgar mờ kấp hơ đơm, dan uă ngan gơ rềng tus broă rơndap lơh nam 2021 là dan ai gơnoar tơn jŏ broă rơndap lơh priă bơcri dà lơgar nam 2021 tus nam 2022.

Cau mblàng K’Duẩn