VOV4.K’ho- Phó Thủ tướng ồng Lê Văn Thành đơng lam pơrjum pờ tơlik tàm internet “Bơsong kal ke ai ală mpồl lơh sa kă bro lơh sa tàm ală tiah lơh sa mờ măi mŏk, tiah lơh sa, tiah lơh gơs phan ngui, tiah lơh sa công nghệ cao mờ mpồl lơh sa mờ măi mŏk”, geh bơyai lơh tàm ngai òr (20/09) tàm Hà Nội.

Jăt Bộ Kế hoạch mờ Đầu tư đơs, kòp Covid-19 gam gơtìp kal ke, jŏ tơngai, neh lơh hoàc huơr uă tus mờ mpồl lơh sa kă bro, làng bol dê. Uă mpồl lơh sa kă bro pal ơm ờ gơtùi lơh sa tài ờ tơl broă ai phan lơh broă, broă lơh, cau lơh broă, uă mpồl lơh sa kă bro pal tơn jơh ală pang sră neh dan cih măt lài, gơtìp dồs, lơh aniai uă tus mờ rài kis bơh git nđờ tơlăk nă cau lơh broă tàm ală tiah lơh sa mờ măi mŏk, tiah lơh sa, tiah lơh broă... Nàng bơsong kal ke, brồ guh lơh sa kă bro ală mpồl lơh sa neh dan mờ Chính phủ sền sơwì mờ ai tơlik ală gùng dà broă lơh, broă bơyai lơh sa geh cồng nha nàng mpồl lơh sa kă bro geh rơwah di pal tus mờ tơl bơta mùl màl; ai mpồl lơh sa kă bro rơcang lơh jăt ală gùng dà broă lơh sa kă bro di pal mờ tơl bơta geh bơh tơl mpồl lơh sa kă bro dê. Mờ dan ală càr, ƀòn dờng ờ gơtùi ngui is ală broă tam dră mờ kòp gơtờp, lơh kal ke mpồl lơh sa kă bro in tŭ pơn diang phan kă bro mờ cau lơh broă tŭ neh lòt lơh broă wơl.

Cau mblàng Ndong Brawl