VOV4.K’ho - Drim òr (24/10), tàm càr Quảng Ninh, Phó Thủ tướng ồng Lê Văn Thành bal mờ mpồl kuang bàng lơh broă bơh Chính phủ neh geh dơ̆ lơh broă mờ Tập đoàn Công nghiệp Chah-Phan geh is Việt Nam bè broă lơh sa kă bro, rài kis công nhân mờ cau lơh broă tàm tập đoàn.

Tập đoàn Công nghiệp Chah-Phan geh is Việt Nam lơh sa kă bro tàm 4 gah tờm là: lơh chah, lơh ồs đèng, lơh phan geh is, lơh phan bơrtoh mờ măi mŏk mờ khà priă geh pah nam rơlao 130 rơbô tơmàn đong. Tềng đăp mờ bơta kal ke bơh kòp Covid-19, mơya Tập đoàn neh tơrgùm lơh jăt niam jơnau kờñ dơ̆ lĕ bal, khà priă geh bơh tập đoàn tus tŭ do kờp dŭ rơlao 96 rơbô tơmàn đong; gàr ring niam broă lơh mờ priă geh bơh 95 rơbô nă cau lơh broă in.

Đơs tàm dơ̆ lơh broă, Phó Thủ tướng ồng Lê Văn Thành đơs là, tập đoàn pal gơtìp mờ uă kal ke, tơlòng, pal geh lơh niam wơl tàm tơngai tus bè: broă lơh chah, ờ uă rơndăp broă bơcri priă gam lơyài broă lơh pơn drờm mờ rơndăp broă geh ai; broă ờ do ờ dă gam sùm di gơlan gơtìp aniai. Tàm tơngu me hơ̆, Phó thủ tướng sồr, gah lơh chah pal pơn jăt tai chồl pràn broă bơ̆t bơtàu wơl Tập đoàn, tơnguh uă cồng nha broă lơh, bơta niam, cồng nha, bơta pràn tàm pơrlòng bơh tơl mpồl lơh broă bal.

Cau mblàng Ndong Brawl