VOV4.K’ho- Mho ngai 27/7, tàm Hà Nội, Ủy viên Bộ Chính trị, Phó Thủ tướng ồng Phạm Bình Minh tus bal pơrjum kuang bàng dờng màng pờ tơn tàm internet rơcang lài ai pơrjum kuang bàng dờng màng bè ală mpồl lơh broă kòi phe, phan sa nam 2021 mờ geh jơnau đơs tàm dơ̆ cribơyai kơ ƀàng wil. Pơrjum tơlik jơnau kờñ jòi geh broă lam lơh pa kờñ dong kờl tam gơl ală mpồl lơh broă phan sa, tơnguh ală broă lơh cèng bơta kac màng mờ bơta lơh broă bal bơh ală cau, ală mpồl dong kờl dê, gơ hòi gơ jà geh bơta tă pơgồp, bơcri priă dà lơgar mờ bơcri priă cau dùl nă să is nàng tề lam broă tam gơl do.

Pơrjum rơcang lài ai Pơrjum kuang bàng dờng màng ală mpồl lơh broă phan sa dunia neh mut lơh tàm hìu lơh broă Mpồl phan sa mờ lơh broă sa suơn sre Liên hợp quốc (FAO) tàm càr lơgar Rome, lơgar Italia jat broă lơh pơrjum tơn pơgồp bal mờ pờ tơn tàm internet. Geh lơh tàm 3 ngai, bơh ngai 26 tus ngai 28/7, pơrjum là bơta rơcang lài ai Pơrjum kuang bàng dờng màng ngan ngồn, kờp dŭ geh lơh tàm hìu lơh broă Liên hợp quốc tàm New York, lơgar Mỹ tàm nhai 9 tus do.

Cau mblàng K’Duẩn