VOV4.K’ho- Tơnơ̆ kơrnuat ơm yah ngài mpồl bơtiàn jơh gùt ƀòn dờng Hồ Chí Minh jat jơnau sồr sồ 15 mờ tiah quận Gò Vấp, sơnah ƀòn Thạnh Lộc bơh Quận 12 dê jat jơnau sồr sồ 16 bơh Thủ tướng Chính phủ dê, drim ngai 31/5, Phó Thủ tướng Thường trực ồng Trương Hòa Bình neh lòt sền broă lơh rơcang sơndră kòp Covid-19 tàm ƀòn dờng. Phó Thủ tướng ồng Trương Hòa Bình neh lòt sền broă lơh sơndră kòp tàm 3 kong ti gơ wèt Khu chế xuất Tân Thuận (quận 7), geh: Kong ti TNHH Mtex Việt Nam, Kong ti TNHH Kim May Organ Việt Nam mờ Kong ti TNHH Nikkiso Việt Nam.

Tơnơ̆ tŭ lòt sền ngan ngồn tàm 3 mpồl lơh sa kă bro tàm khu chế xuất Tân Thuận, Phó Thủ tướng bal mờ mpồl pơn jat tai lòt sền broă sơndră kòp tàm anih tam cah is Hìu ơm bal Đại hocj dà lơgar ƀòn dờng Hồ Chí Minh. Do là dùl tàm ală hìu ơm bal dờng ngan rlau jơh bơh ală hìu bơsram đại học, cao đẳng dê tàm ƀòn dờng geh Ủy ban Nhân dân ƀòn dờng Hồ Chí Minh ai ngui nàng lơh ală anih tam cah is rơcang lài ai ală cau ơm rềp mờ cau bơtờp virus Sars CoV-2.

Cau mblàng K’Duẩn